ប្រទេសចិនបានពង្រឹងការគ្រប់គ្រងលើការនាំចេញរ៉ែកម្រ នៅថ្ងៃព្រហស្បតិ៍ (ទី៩ ខែតុលា) នេះ ដោយពង្រីកការរឹតបន្តឹងលើបច្ចេកវិទ្យាកែច្នៃ និងកិច្ចសហប្រតិបត្តិការក្រៅប្រទេស ដែលមិនមានការអនុញ្ញាត ហើយបង្ហាញយ៉ាងច្បាស់ពីចេតនារបស់ខ្លួន ក្នុងការកម្រិតការនាំចេញទៅកាន់អ្នកប្រើប្រាស់ផ្នែកការពារជាតិ និងបន្ទះឈីបនៅក្រៅប្រទេស។

សេចក្តីប្រកាសពីក្រសួងពាណិជ្ជកម្ម បញ្ជាក់ និងពង្រីកនូវការគ្រប់គ្រងត្រួតពិនិត្យយ៉ាងទូលំទូលាយដែលត្រូវបានប្រកាសកាលពីខែមេសា ជាការសម្រេចដែលបណ្តាលឲ្យមានការខ្វះខាតយ៉ាងខ្លាំង នៅជុំវិញពិភពលោក មុនពេលកិច្ចព្រមព្រៀងជាបន្តបន្ទាប់ជាមួយអឺរ៉ុប និងសហរដ្ឋអាមេរិកបានចាប់ផ្ដើមការនាំចេញឡើងវិញ។

ចិនមានប្រហែល ៦០ភាគរយនៃផលិតផលរ៉ែពិភពលោក និង ៩០ភាគរយនៃទិន្នផលមេដែកកែច្នៃ និងអចិន្ត្រៃយ៍។ រ៉ែកម្រ គឺជាវត្ថុធាតុដើមដ៏សំខាន់នៅក្នុងផលិតផលនានា រាប់ចាប់ពីរថយន្តអគ្គិសនី រហូតដល់ម៉ាស៊ីនយន្តហោះ និងរ៉ាដាយោធា។

ការរឹតបន្តឹងលើការនាំចេញបច្ចេកវិទ្យា ដើម្បីផលិតមេដែករ៉ែកម្រ នឹងពង្រីកទៅដល់មេដែកជាច្រើនប្រភេទទៀត។ ឧបករណ៍ដែលប្រើ ដើម្បីកែច្នៃរ៉ែកម្រឥឡូវនេះ ក៏នឹងទាមទារឲ្យមានអាជ្ញាប័ណ្ណនាំចេញផងដែរ ដោយបន្ថែមវាទៅក្នុងបញ្ជីនៃបច្ចេកវិទ្យាកែច្នៃរ៉ែកម្រដែលចិនបានដាក់កម្រិត។

ក្រសួងបានបញ្ជាក់បន្ថែមថា ក្រុមហ៊ុនផលិតនៅក្រៅប្រទេសដែលប្រើប្រាស់គ្រឿងបង្គុំ ឬគ្រឿងចក្ររបស់ចិន ត្រូវតែដាក់ពាក្យសុំអាជ្ញាប័ណ្ណ ដើម្បីនាំចេញផលិតផលដែលត្រូវបានដាក់កម្រិតផងដែរ៕