ផ្លូវក្រាលកៅស៊ូពីរជាន់ (DBST) ចំនួន១ខ្សែ នៅឃុំកណ្តោក ស្រុកកណ្តាលស្ទឹង ស្ថិតក្រោមក្របខ័ណ្ឌក្រសួងអភិវឌ្ឍន៍ជនបទ បាន កំពុងលើកកម្ពស់កម្រិតជីវភាពការរស់នៅរបស់ប្រជាជន តាមរយៈការធ្វើដំណើរ ការប្រកបអាជីវកម្មផ្សេងៗ នឹងនៅពេលខាងមុខ ផ្លូវនេះ នឹងជួយសម្រួលដល់ការចេញ-ចូលទៅកាន់ព្រលានយន្តហោះថ្មី បន្ទាប់ពីការតភ្ជាប់គ្នារួច។ 

លោកជំទាវ ឯក គន្ធវារី អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើកឡើងនៅក្នុងការចុះត្រួតពិនិត្យ វាយតម្លៃ លើការងារលើកកម្រិតគុណភាពផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង ១ ៧០០ម៉ែត្រ ទទឹង៧ ម៉ែត្រ និងសំណង់សិល្បការ្យផ្សេងៗ នៅថ្ងៃទី៩ ខែតុលា ឆ្នាំ២០២៥នេះថា ជុំវិញការងារអភិវឌ្ឍន៍នៅតាមជនបទ រាជរដ្ឋាភិបាលក្នុងអាណត្តិទី៧ នៃរដ្ឋសភា, ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បាននិងកំពុងបន្តកែលម្អលក្ខខណ្ឌនៃការរស់នៅរបស់សហគមន៍ជនបទ ក្នុងគោលដៅជំរុញការ លើកកម្ពស់ជីវភាពរបស់ប្រជាជន តាមរយៈការស្តារ ការស្ថាបនាហេដ្ឋារចនាសម្ព័ន្ធគមនាគមន៍ដឹកជញ្ជូននៅជនបទជាដើម ដើម្បីធ្វើឱ្យប្រសើរឡើងសម្រាប់ជីវភាពរស់នៅប្រចាំថ្ងៃ។

លោកជំទាវ បន្តថា ជាក់ស្តែងការអភិវឌ្ឍផ្លូវខាងលើនេះ ពិតជាមានសារៈសំខាន់ណាស់ ដោយមិនត្រឹមបម្រើដល់ការរស់នៅ របស់ប្រជាពលរដ្ឋនៅក្នុងមូលដ្ឋានប៉ុណ្ណោះទេ តែនៅពេលខាងមុខ បន្ទាប់ពីផ្លូវនេះបានតភ្ជាប់ផ្លូវទៅកាន់ផ្លូវព្រលានយន្តហោះ អន្តរជាតិភ្នំពេញតេជោ នឹងអាចជួយសម្រួលដល់ការធ្វើដំណើរ ចេញ-ចូលទៅកាន់ព្រលានយន្តហោះ នឹងសម្រួលដល់ការកក់ស្ទះនានាផងដែរ, ពោលគឺបញ្ហាផ្លូវជនបទនេះ ក្រសួងអភិវឌ្ឍន៍ជនបទ ក្រោមការដឹកនាំរបស់ឯកឧត្តម ឆាយ ឫទ្ធិសែន, ឯកឧត្តមរដ្ឋមន្រ្តី បានយកចិត្តទុកដាក់យ៉ាងខ្លាំង ក្នុងគោលដៅជំរុញធ្វើពិពិធកម្មសកម្មភាពសេដ្ឋកិច្ចនៅជនបទ ដើម្បីរួមចំណែកបង្កើនឱកាសការងារ កាត់បន្ថយការចំណាកស្រុក ព្រមទាំងជំរុញឱ្យមានការផ្លាស់ប្តូរស្ថានភាពរស់នៅឱ្យកាន់តែប្រសើរ។

លោកជំទាវ ឯក គន្ធវារី ក៏បានថ្លែងនូវការកោតសរសើរ ដល់នាយកដ្ឋានវិស្វកម្ម ក្រសួងការពារជាតិ ដែលបានខិតខំប្រឹងប្រែង ស្ថាបនា សម្រេចតាមផែនការរបស់ខ្លួន ស្របតាមចក្ខុវិស័យរបស់ក្រសួងអភិវឌ្ឍន៍ជនបទ ដែលបាននិងកំពុងគិតគូរពីភាពធន់ និងការ បម្រែបម្រួលទៅនិងអាកាសធាតុរួមមាន៖ ផ្លូវដីស ផ្លូវល្បាយក្រួស និងផ្លូវកៅស៊ូពីរជាន់ ឬក្រាលបេតុង ដើម្បីបង្ករភាពងាយស្រួលដល់ ប្រជាពលរដ្ឋក្នុងការធ្វើដំណើរ ចំណេញពេលវេលា កាត់បន្ថយចំណាយលើការដឹកជញ្ជូន និងការផ្តល់ភាពងាយស្រួលក្នុងការទទួល បាននូវសេវាសាធារណៈជាដើម៕

 អត្ថបទ៖ សុន រ៉ាឌី