ភ្នំពេញ ៖ អាជ្ញាធររាជធានីភ្នំពេញ សហការជាមួយ រដ្ឋបាលខណ្ឌច្បារអំពៅ បានកំពុងយកចិត្តទុកដាក់ក្នុងចុះដោះស្រាយបន្ទាន់លើបញ្ហាទឹកជន់លិចផ្លូវនៅតំបន់ផ្សារបឹងព្រលឹត ដើម្បីធ្វើយ៉ាងណាឲ្យស្ថានភាពកំពុងជន់លិចនៅតំបន់នោះ នឹងវិលទៅរកប្រក្រតីភាពឡើងវិញ ក្នុងពេលឆាប់ៗបំផុតខាងមុខនេះ ។

នៅរសៀលថ្ងៃទី០៩ ខែតុលា ឆ្នាំ២០២៥នេះ ឯកឧត្តមឯក ឃុនឌឿន អភិបាលរងរាជធានីភ្នំពេញ រួមទាំងលោកចេង មុនីរ៉ា អភិបាលខណ្ឌច្បារអំពៅ បានដឹកនាំក្រុមមន្ត្រីជំនាញ បន្តចុះទៅដោះស្រាយបញ្ហាទឹកជន់លិចជាក់ស្តែង នៅលើផ្លូវជុំវិញផ្ទះបងប្អូនប្រជាពលរដ្ឋ ក្នុងតំបន់ផ្សារបឹងព្រលឹត ស្ថិតក្នុងភូមិអូរអណ្តូងទី១ សង្កាត់ព្រែកប្រា ខណ្ឌច្បារអំពៅ ។

កម្លាំងអាជ្ញាធរចម្រុះ បានប្រើប្រាស់រថយន្តប៊ូមទឹក និងម៉ាស៊ីនប៊ូមរុញទឹក ដែលសមត្ថភាពបំពាក់ទុយោប៊ូមចំនួន០២ អាចប៊ូមក្នុងពេលតែមួយ ធ្វើការប៊ូមទឹក ចេញពីតំបន់កំពុងមានការជន់លិចខាងលើ ។

លោកចេង មុនីរ៉ា អភិបាលខណ្ឌច្បារអំពៅ បញ្ជាក់ថា ៖ ការងារនេះ នឹងសម្រេចលទ្ធផលឲ្យបានលឿនបំផុត ដើម្បីកុំឲ្យបន្តមានការប៉ះពាល់ដល់ការរស់នៅរបស់បងប្អូនប្រជាពលរដ្ឋក្នុងតំបន់នោះ ក្នុងរយៈពេលយូរ ។ ក្រោយរំដោះទឹកជន់អស់ហើយនោះ អាជ្ញាធរនឹងធ្វើការបាញ់លាងសម្អាតផ្លូវឲ្យបានស្អាតល្អជូនបងប្អូនប្រជាពលរដ្ឋឡើងវិញ ។

លោកអភិបាលខណ្ឌ បញ្ជាក់បន្ថែមថា ៖ នេះពុំមែនជាជំនន់ទឹកភ្លៀង ឬទឹកដែលមានប្រភពហូរហៀរពីតំបន់ណាមកនោះទេ វាជាទឹកដែលច្រាលចេញពីប្រព័ន្ធលូត្រឡប់ឡើងមកវិញប៉ុណ្ណោះ ដោយសារចរន្តទឹកតាមប្រព័ន្ធលូក្នុងតំបន់ហូរពុំទាន់ ខណៈមួយរយៈក្រោយមកនេះ ភ្ញៀវក៏នៅបន្តធ្លាក់ខ្លាំងគួរសម ពិសេសនោះ នៅក្នុងឆ្នាំនេះ ទឹកទន្លេបាសាក់ក៏កាន់តែហក់ឡើងខ្លាំងជាជាងរៀងរាល់ឆ្នាំកន្លងមក ទើបធ្វើឲ្យចរន្តបង្ហូរទឹកក៏មានការរាំងស្ទះតាមតំបន់ខ្លះ ។

ក្នុងនាមអាជ្ញាធរ នៃរដ្ឋបាលខណ្ឌ លោកចេង មុនីរ៉ា អភិបាលខណ្ឌ ក៏សូមសម្តែងនូវការអភ័យទោសទៅដល់បណ្តាបងប្អូនប្រជាពលរដ្ឋកំពុងរស់នៅក្នុងតំបន់ផ្សារបឹងព្រលឹតទាំងអស់ដែលរងផលប៉ះពាល់ និងសុំការយោគយល់អាធ្យាស្រ័យផងដែរ ចំពោះបញ្ហាទឹកលិចផ្លូវនៅតំបន់រស់នៅរបស់បងប្អូន ប៉ុន្តែទោះជាយ៉ាងណាក្តី អាជ្ញាធរមិនបានបណ្តែតបណ្តោយឲ្យបញ្ហានេះ ក្លាយជាដំបៅ ដែលព្យាបាលមិនជានោះទេ គឺកំពុងបង្កើនការយកចិត្តទុកដាក់ចុះដោះស្រាយឲ្យបានលឿនបំផុត ដើម្បីឲ្យបងប្អូនប្រជាពលរដ្ឋអាចរស់នៅ និងប្រកបរបររកស៊ីទទួលទាន បានឡើងវិញជាធម្មតា នៅក្នុងពេលឆាប់ៗខាងមុខនេះ៕ លីហេង