យ៉ាងហោចណាស់មានក្រុមអ្នកតវ៉ាប្រឆាំងរដ្ឋាភិបាលចំនួន១.០០០នាក់ បានចេញធ្វើបាតុកម្មនៅក្នុងរដ្ឋធានីប្រទេសម៉ាដាហ្គាស្ការ ដើម្បីទាមទារឱ្យប្រធានាធិបតីលាលែងពីតំណែង ខណៈនគរបាលបានប្រើឧស្ម័នបង្ហៀរទឹកភ្នែក គ្រាប់បែកផ្សែង និងគ្រាប់កាំភ្លើងជ័រដើម្បីបំបែកហ្វូងមនុស្ស។ បាតុកម្មកាលពីថ្ងៃព្រហស្បត្តិ៍ កើតឡើងនៅក្នុងសប្តាហ៍ទី៣នៃភាពវឹកវរខ្លាំងបំផុត ដែលបានវាយលុកក្នុងប្រទេសកោះនៅមហាសមុទ្រឥណ្ឌា ក្នុងរយៈពេលជាច្រើនឆ្នាំមកនេះ។

រៀបចំឡើងដោយក្រុម «Gen Z Madagascar» ដែលចាត់ទុកខ្លួនឯងថាជា «ចលនាស៊ីវិល និងសន្តិវិធី» ការតវ៉ាដំបូងត្រូវបានបង្កឡើងដោយការខកចិត្តចំពោះការដាច់ទឹកប្រើប្រាស់ និងការដាច់ចរន្តអគ្គិសនី ប៉ុន្តែមិនយូរប៉ុន្មានបានប្រែក្លាយទៅជាកំហឹងជុំវិញការចោទប្រកាន់ពីអំពើពុករលួយ និងបក្ខពួកនិយម។ ការប្រមូលផ្តុំគ្នាកាលពីថ្ងៃព្រហស្បតិ៍ បានធ្វើឡើងបន្ទាប់ពីអ្នករៀបចំការតវ៉ាបានអំពាវនាវឱ្យមានកូដកម្មទូទៅមួយហើយបានច្រានចោលការប៉ុនប៉ងរបស់លោកប្រធានាធិបតី Andry Rajoelina ក្នុងការលុបបំបាត់ភាពតានតឹងដែលកំពុងធ្វើឲ្យរង្គោះរង្គើរប្រទេស។

នគរបាលបានបាញ់ឧស្ម័នបង្ហៀរទឹកភ្នែក និងគ្រាប់កាំភ្លើងជ័រទៅលើបាតុករមួយចំនួន ដែលបានឆ្លើយតបវិញដោយគប់ដុំថ្ម។ ទីភ្នាក់ងារសារព័ត៌មាន បានរាយការណ៍ថា ឧស្ម័នបង្ហៀរទឹកភ្នែកបានបាញ់នៅជិតបន្ទប់សម្ភពមួយដែលបានបង្ខំឲ្យបុគ្គលិកគិលានុបដ្ឋាយិកាផ្លាស់ទីតាំងទារកកើតមិនគ្រប់ខែទៅខាងក្រោយអគារវិញ។ សារព័ត៌មាននិយាយថា មនុស្សយ៉ាងហោចណាស់៤នាក់ បានរងរបួសដោយគ្រាប់កាំភ្លើងជ័រ និង២នាក់ទៀតរបួសដោយវត្ថុចេញពីគ្រាប់បែកផ្សែង។