ការបិទរដ្ឋាភិបាលអាមេរិក មិនទាន់មានទីបញ្ចប់ទេ ហើយមើលទៅគ្រោងនឹងបន្តដល់សប្តាហ៍ទី៣ ខណៈសមាជិកព្រឹទ្ធសភាបានច្រានចោលជាថ្មីម្តងទៀតនូវសំណើផ្តល់មូលនិធិរបស់គណបក្សសាធារណរដ្ឋ កាលពីថ្ងៃព្រហស្បតិ៍ (៩ តុលា) បើទោះបីជាលោកប្រធានាធិបតីអាមេរិក Donald Trump បង្កើនសម្ពាធលើគណបក្សប្រជាធិបតេយ្យឱ្យយល់ព្រមទម្លាយភាពជាប់គាំងក៏ដោយ។

ភ្នាក់ងារសហព័ន្ធបានអស់ថវិកាតាំងពីថ្ងៃទី១ ខែតុលា មក ហើយសេវាសាធារណៈត្រូវបានផ្អាក ស្របពេលកិច្ចចរចារវាងគណបក្សទាំងពីរត្រូវជាប់គាំង ដែលនាំឱ្យការបោះឆ្នោតលើកញ្ចប់ចំណាយថ្មីដើម្បីបើកដំណើរការរដ្ឋាភិបាលអាមេរិកឡើងវិញ ត្រូវបរាជ័យស្ទើរតែរាល់ថ្ងៃ។

ដោយពុំមានសញ្ញានៃការទម្លាយភាពទាល់ច្រក ព្រឹទ្ធសភាបានពន្យារពេលបោះឆ្នោតរហូតដល់ថ្ងៃអង្គារសប្ដាហ៍ក្រោយ — ដែលមានន័យថានឹងមិនមានការបោះឆ្នោតណាមួយត្រូវធ្វើឡើងក្នុងអំឡុងពេលនេះឡើយ រហូតដល់ពេលកំណត់ថ្ងៃអង្គារ។ លោក Trump បានគំរាមម្តងទៀតក្នុងការកាត់បន្ថយកម្មវិធីរដ្ឋាភិបាលរបស់បក្សប្រជាធិបតេយ្យ ខណៈលោកស្ដីបន្ទោសបក្សនេះក្នុងកិច្ចប្រជុំគណៈរដ្ឋមន្ត្រី។

លោក Trump បាននិយាយថា ការបិទរដ្ឋាភិបាលដោយសារបក្សប្រជាធិបតេយ្យ កំពុងបង្កភាពឈឺចាប់ និងទុក្ខលំបាកដល់ប្រជាជនអាមេរិក រួមទាំងយោធា អ្នកត្រួតពិនិត្យចរាចរណ៍ផ្លូវអាកាស និងរាស្រ្តក្រីក្រ ស្រ្តីមានកូនតូច រួមទាំងមជ្ឃដ្ឋានទូទៅ នៅទូទាំងសហរដ្ឋអាមេរិក៕