ប្រធានាធិបតីអាមេរិក លោក Donald Trump និងសមភាគីហ្វាំងឡង់ លោក Alexander Stubb បានចុះហត្ថលេខាលើកិច្ចព្រមព្រៀងមួយកាលពីថ្ងៃព្រហស្បតិ៍ (៩ តុលា) ដែលនឹងមើលឃើញទីក្រុងវ៉ាស៊ីនតោន ទិញនាវាបំបែកទឹកកកចំនួន ១១គ្រឿង សម្រាប់ឆ្មាំល្បាតឆ្នេរអាមេរិក ដើម្បីពង្រឹងសន្តិសុខជាតិរបស់ខ្លួននៅតំបន់អាក់ទិក។

លោក Trump និងលោក Stubb បានបង្កើតទំនាក់ទំនងមិត្តភាព ចាប់តាំងពីលោក Trump ឡើងកាន់អំណាចអាណត្តិទីពីរក្នុងខែមករា ឆ្នាំនេះមក ហើយមេដឹកនាំទាំងពីរបានជួបគ្នាក្នុងខែមីនា នៅក្លឹបវាយកូនហ្គោលរដ្ឋ Florida របស់ប្រធានាធិបតីអាមេរិករូបនេះ និងបានលេងកីឡានេះមួយគ្នា។

មេដឹកនាំទាំងពីរបានអនុម័តលើអនុស្សរណៈយោគយល់គ្នាស្តីពីកិច្ចសហប្រតិបត្តិការនាវាពុះបំបែកទឹកកក ដែលមានបំណងក្រាលមូលដ្ឋានគ្រឹះសម្រាប់កិច្ចព្រមព្រៀងពាណិជ្ជកម្មរវាងឆ្មាំល្បាតឆ្នេរអាមេរិក និងក្រុមហ៊ុនហ្វាំងឡង់។ ក្រោមកិច្ចព្រមព្រៀងនេះ ហ្វាំងឡង់នឹងសង់នាវាបំបែកទឹកកក ដែលឱ្យឈ្មោះថា "យានកាត់សន្តិសុខអាក់ទិក" (ASC) ចំនួន ៤គ្រឿង នៅទីតាំងផលិតនាវាក្នុងប្រទេសហ្វាំងឡង់ ហើយបន្ទាប់មកសហរដ្ឋអាមេរិក នឹងប្រើអ្នកជំនាញហ្វាំងឡង់ ដើម្បីសង់នាវា ASC នេះថ្មីរហូតដល់ ៧គ្រឿងទៀត នៅក្នុងកន្លែងផលិតនាវានៅសហរដ្ឋអាមេរិក។

មន្ត្រីសេតវិមានបាននិយាយថា យាន ASC ១១គ្រឿងនេះ — ដែលជានាវាបំបែកទឹកកកខ្នាតមធ្យមថ្មីប្រើដោយឆ្មាំល្បាតឆ្នេរអាមេរិក — ត្រូវរំពឹងថានឹងចំណាយអស់ប្រហែល ៦,១ពាន់លានដុល្លារ៕