បាល់ទាត់៖ បន្ទាប់ពីសម្រេចបំណងបង្កើតសាលាបាល់ទាត់ «ពស់កេងកង» លោកព្រឹទ្ធាចារ្យ ប៉ែន ផាត បានបង្ហើបនូវក្ដីស្រម៉ៃចង់ឃើញកូនសិស្សជំនាន់ទី១ របស់ខ្លួននេះបានលេងឲ្យក្រុមជម្រើសជាតិកម្ពុជានាថ្ងៃអនាគតដូចខ្លួនដែរ។ អតីតកីឡាករបាល់ទាត់ដ៏ល្បីឈ្មោះរបស់កម្ពុជាកាលពីទសវត្យរ៍ ៦០ និង ៧០ រូបនេះបានថ្លែងប្រាប់ក្រុមការងារ BTV-News មុនឡើងយន្ដហោះឆ្ពោះទៅប្រទេសបារាំងកាលពីថ្មីៗថា ការបង្កើតសាលាបាល់ទាត់នេះ ព្រោះលោកចង់ឲ្យវិស័យកីឡាបាល់ទាត់កម្ពុជាមានថ្នាលបន្ដវេនតាំងពីតូច ពិសេសយុវជនថ្នាលក្រោមអាយុ ១០ឆ្នាំ។
ដូច្នេះបន្ទាប់ពីមានដៃគូសហការបង្កើតសាលាបាល់ទាត់ «ពស់កេងកង» ចង់រំពឹងថា នៅថ្ងៃអនាគតនឹងមានកូនសិស្សរបស់ខ្លួនជាប់ជម្រើសជាតិកម្ពុជា ដូចកីឡាករជម្រើសជាតិថៃមួយចំនួនដែលទទួលបានការបណ្ដុះបណ្ដាលពីលោកដូច្នោះដែរ។ មិនតែប៉ុណ្ណោះ លោកក៏មានគម្រោងពង្រីកសាលាបាល់ទាត់នេះឲ្យកាន់តែធំទូលាយ និងស្ដង់ដារទៀតផង។ គួរដឹងថា សាលាបាល់ទាត់ដែលប្រើប្រាស់រហស្សនាមផ្ទាល់របស់លោកព្រឹទ្ធាចារ្យ ប៉ែន ផាត គឺ «ពស់កេងកង» បានបើកដំណើរការបង្ហាត់កាលពីថ្ងៃទី២៣ ខែមករា ឆ្នាំ២០២២ ថ្មីៗកន្លងទៅក្រោមការបង្ហាត់របស់លោកផ្ទាល់។ ប៉ុន្ដែអំឡុងពេលលោក ប៉ែន ផាត ទៅប្រទេសបារាំង លោកក៏មានក្រុមការងារគ្រូ ៣នាក់ផ្សេងៗដើម្បីរ៉ាប់រងការបង្ហាត់កូនសិស្ស ដែលជំហានដំបូងសាលាបានទទួលកូនសិស្សត្រឹម ១៥នាក់ប៉ុណ្ណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
