ក្រុមចម្រុះកំពុងកាន់អំណាចរបស់ប្រទេសជប៉ុន បានបែកបាក់គ្នា នៅថ្ងៃសុក្រ (ទី១០ ខែតុលា) នេះ នៅពេលដែលដៃគូ គឺគណបក្ស Komeito បានដកខ្លួនចេញពីសម្ព័ន្ធភាពយូរអង្វែងរបស់ខ្លួនជាមួយគណបក្សប្រជាធិបតេយ្យសេរីនិយម (LDP)។

ការវិវត្តចុងក្រោយនេះ បានធ្វើឲ្យមានការប៉ះពាល់យ៉ាងធ្ងន់ធ្ងរដល់ដំណើរផ្លូវរបស់មេដឹកនាំគណបក្ស LDP គឺលោកស្រី Sanae Takaichi ទៅកាន់តំណែងនាយករដ្ឋមន្ត្រី។

លោកស្រី Takaichi ដែលជាអ្នកអភិរក្សនិយមរឹងត្អឹង បានជាប់ឆ្នោតជាប្រធានបក្ស LDP កាលពីចុងសប្តាហ៍មុន ហើយនឹងត្រូវជំនួសតំណែងលោកនាយករដ្ឋមន្ត្រី Shigeru Ishiba នៅចុងខែនេះ។ ការអនុម័តយល់ព្រម ចំពោះតំណែងរបស់លោកស្រី នៅក្នុងសភា ត្រូវបានចាត់ទុកថា គ្រាន់តែជាការអនុវត្តតាមនិតីវិធីប៉ុណ្ណោះ ប៉ុន្តែបើគ្មានការបោះឆ្នោតពីគណបក្ស Komeito សំឡេងភាគច្រើនរបស់លោកស្រី បានរសាត់បាត់ទៅហើយ។

ប្រមុខគណបក្ស Komeito លោក Tetsuo Saito បាននិយាយថា គណបក្សរបស់លោក មិនអាចគាំទ្រលោកស្រី Takaichi បានទេ ដោយសារតែបក្ស LDP បានបរាជ័យក្នុងការដោះស្រាយរឿងអាស្រូវមូលនិធិនយោបាយដែលធ្វើឲ្យរដ្ឋាភិបាលរង្គោះរង្គើរយៈពេល ២ឆ្នាំមកហើយ។

យ៉ាងណាក្ដី លោកស្រី Takaichi ដែលសង្ឃឹមក្លាយជានាយករដ្ឋមន្ត្រីស្ត្រីដំបូងរបស់ជប៉ុន បានចាត់ទុកការសម្រេចនេះថា ជារឿង «គួរឲ្យសោកស្តាយបំផុត» និងជា «ឯកតោភាគី» ប៉ុន្តែបានបញ្ជាក់ថា លោកស្រីនឹងបន្តស្វែងរកការគាំទ្រពីសភា។ គណបក្ស Komeito បានបញ្ជាក់ថា ខ្លួននឹងនៅតែគាំទ្រវិធានការថវិការួម និងគោលនយោបាយដែលកំពុងដំណើរការរួចហើយ ប៉ុន្តែមិនមែនការតែងតាំងលោកស្រី Takaichi ជានាយករដ្ឋមន្ត្រីនោះទេ។

គួរបញ្ជាក់ថា លោកស្រី Takaichi បានក្លាយជាមេដឹកនាំគណបក្ស បន្ទាប់ពីអតីតនាយករដ្ឋមន្ត្រី លោក Shigeru Ishiba បានប្រកាសថា លោកនឹងចុះចេញពីតំណែងកំពូលនេះ បន្ទាប់ពីក្រុមចម្រុះដែលកំពុងកាន់អំណាចរបស់លោក បានបាត់បង់សំឡេងភាគច្រើន នៅក្នុងសភាទាំង២ ក្នុងរយៈពេលពេញមួយឆ្នាំ៕