អ៊ីស្រាអែល គ្រោងនឹងកម្ទេចចោលនូវអ្វីដែលនៅសេសសល់នៃបណ្តាញផ្លូវរូងក្រោមដីរបស់ក្រុមហាម៉ាស នៅក្រោមតំបន់ហ្កាហ្សា ដោយបញ្ជាក់ថា នឹងប្រតិបត្តិការដោយមានការយល់ព្រមពីសហរដ្ឋអាមេរិក បន្ទាប់ពីចំណាប់ថ្នូររបស់ខ្លួន ត្រូវបានដោះលែង។ នេះបើតាមការបញ្ជាក់ពីមន្ត្រីមួយរូប នាថ្ងៃអាទិត្យ (ទី១២ ខែតុលា) នេះ។

រដ្ឋមន្ត្រីការពារជាតិ លោក Israel Katz បាននិយាយថា ប្រតិបត្តិការនេះ នឹងធ្វើឡើងក្រោម «យន្តការអន្តរជាតិ» ដឹកនាំដោយសហរដ្ឋអាមេរិក ជាអ្នកគាំទ្រឲ្យមានបទឈប់បាញ់នៅតំបន់ហ្កាហ្សារយៈពេល ៣ថ្ងៃមកហើយ។

លោគ Katz បានលើកឡើងនៅក្នុងសេចក្តីថ្លែងការណ៍មួយថា៖ «បញ្ហាប្រឈមដ៏ធំបំផុតរបស់អ៊ីស្រាអែល បន្ទាប់ពីដំណាក់កាលដោះលែងចំណាប់ថ្នូរ នឹងជាដំណើរការបំផ្លាញផ្លូវរូងក្រោមដីទាំងអស់របស់ក្រុមភេរវករហាម៉ាស នៅក្នុងហ្កាហ្សា។ ខ្ញុំបានបញ្ជាកងទ័ពឲ្យរៀបចំ ដើម្បីបំពេញបេសកកម្មនេះ»។

គួរបញ្ជាក់ថា ក្រុមសកម្មប្រយុទ្ធហាម៉ាសប៉ាឡេស្ទីន ប្រើប្រាស់បណ្តាញផ្លូវរូងក្រោមដី នៅក្រោមតំបន់ហ្កាហ្សា ដែលអាចឲ្យក្រុមយុទ្ធជនរបស់ខ្លួនធ្វើប្រតិបត្តិការគេចពីការឈ្លបយកការណ៍របស់អ៊ីស្រាអែល។ ផ្លូវខ្លះបានឆ្លងកាត់តាមរបងព្រំដែនចូលទៅអ៊ីស្រាអែល ដែលអចបង្កជាការវាយប្រហារដ៏គួរឲ្យភ្ញាក់ផ្អើល។

យ៉ាងណាក្ដី ផ្លូវជាច្រើនត្រូវបានបំផ្លាញរួចហើយ ក្នុងអំឡុងពេលមានសង្គ្រាមរយៈពេល ២ឆ្នាំ ដែលបង្កឡើងដោយការវាយលុកឆ្លងព្រំដែន កាលពីថ្ងៃទី៧ ខែតុលា ឆ្នាំ២០២៣ របស់ក្រុមនេះចូលទៅក្នុងដែនដីអ៊ីស្រាអែល។ ហើយលោក Katz បាននិយាយថា អ្វីដែលនៅសេសសល់ នឹងត្រូវបំផ្លាញចោលក្រោមក្របខណ្ឌនៃការរំសាយអាវុធ និងគ្មានកម្លាំងយោធារបស់ក្រុមហាម៉ាស ដែលបានព្យាករថា នឹងមាននៅក្នុងដំណាក់កាលបន្ទាប់នៃផែនការបទឈប់បាញ់គាំទ្រដោយសហរដ្ឋអាមេរិក។

ក្រុមហាម៉ាសបានយល់ព្រមលើដំណាក់កាលដំបូងនៃផែនការនេះ ដែលនាំឲ្យមានបទឈប់បាញ់ កាលពីថ្ងៃសុក្រ ហើយនៅថ្ងៃចន្ទ គួរតែឃើញមានការដោះលែងចំណាប់ថ្នូរអ៊ីស្រាអែលចំនួន ៤៨នាក់ ទាំងនៅរស់ និងស្លាប់៕