រថយន្តដឹកទំនិញរាប់រយគ្រឿង ដែលមានផ្ទុកគ្រឿងផ្គត់ផ្គង់យ៉ាងច្រើនសន្ធឹកសន្ធាប់ បានឆ្លងកាត់ព្រំដែនក្រុង Rafah ផ្នែកខាងប្រទេសអេហ្ស៊ីប កាលពីថ្ងៃអាទិត្យ (១២ តុលា) ចូលទៅតំបន់ហ្កាហ្សា ក្រោមកិច្ចព្រមព្រៀងឈប់បាញ់ថ្មីដែលកំពុងបន្ត ខណៈប្រជាជនប៉ាឡេស្ទីនរាប់ម៉ឺននាក់ធ្វើដំណើរត្រឡប់ទៅផ្ទះសម្បែងវិញ។

ទន្ទឹមនឹងនេះ មេដឹកនាំពិភពលោកត្រូវបានគេរំពឹងថានឹងប្រមូលផ្តុំគ្នានៅអេហ្ស៊ីប នាថ្ងៃចន្ទ (១៣ តុលា) នេះ ដើម្បីសម្រេចចុងក្រោយលើកិច្ចព្រមព្រៀងសន្តិភាពរបស់សហរដ្ឋអាមេរិក។ អឌ្ឍចន្ទក្រហមអេហ្ស៊ីប បាននិយាយថា រថយន្តដឹកទំនិញទាំងនោះនឹងត្រូវត្រួតពិនិត្យដោយកងកម្លាំងអ៊ីស្រាអែល មុនពេលអនុញ្ញាតឱ្យចូល ដោយដឹកសម្ភារៈវេជ្ជសាស្រ្ត តង់ ភួយ ស្បៀងអាហារ និងប្រេងឥន្ធនៈជាដើម។

អេហ្ស៊ីបនិយាយថា ខ្លួនកំពុងបញ្ជូនរថយន្តដឹកជំនួយចំនួន ៤០០គ្រឿង ហើយអង្គការសហប្រជាជាតិ បាននិយាយថា ខ្លួនមានស្បៀងអាហារ ឱសថ និងជំនួយមនុស្សធម៌ផ្សេងទៀតប្រហែល ១៧ម៉ឺនតោន ដែលត្រៀមរួចជាស្រេច។ កម្មវិធីស្បៀងអាហារពិភពលោក WFP របស់អង្គការសហប្រជាជាតិ បាននិយាយក្នុងសេចក្តីថ្លែងការណ៍មួយថា "នោះជាស្បៀងសំខាន់ៗ និងគ្រប់គ្រាន់ដើម្បីចិញ្ចឹមប្រជាជនហ្កាហ្សាទាំងមូល ដែលមានជាង ២លាននាក់ ក្នុងពេល ៣ខែ"។

គួរឱ្យដឹងថា ចាប់ពីថ្ងៃអាទិត្យ ទី១២ ខែតុលា តទៅ បរិមាណជំនួយចូលក្នុងតំបន់ហ្កាហ្សាដែលបំផ្លិចបំផ្លាញដោយសង្រ្គាម ត្រូវរំពឹងថានឹងកើនឡើងដល់ប្រហែល ៦០០រថយន្ត ក្នុងមួយថ្ងៃ ដូចដែលបានគូសបញ្ជាក់ក្នុងកិច្ចព្រមព្រៀងបទឈប់បាញ់៕