ប្រធានាធិបតីថ្មីរបស់ប្រទេសប៉េរូ លោក Jose Jeri បានប្រឈមនឹងការតវ៉ាជាលើកដំបូងរបស់លោកកាលពីថ្ងៃអាទិត្យ ទី១២ ខែតុលា ដោយលោកបានចូលរួមក្នុងកិច្ចសន្ទនាជាមួយលោក Aldo Marinos អភិបាលក្រុងក្នុងតំបន់ដែលបានដង្ហែក្បួនតវ៉ាជាច្រើនថ្ងៃទៅកាន់ទីក្រុងលីម៉ា ដើម្បីទាមទារការយកចិត្តទុកដាក់បន្ថែមទៀតសម្រាប់តំបន់របស់លោក។

លោក Marinos អភិបាលក្រុង Pataz ជាទីក្រុងតូចមួយចម្ងាយប្រហែល៨៨០ គីឡូម៉ែត្រ ភាគខាងជើងទីក្រុង Lima បានចាប់ផ្តើមការហែក្បួនតវ៉ាទៅកាន់រដ្ឋធានីកាលពីថ្ងៃទី២៥ ខែសីហា ដើម្បីប្រឆាំងនឹងកង្វះការវិនិយោគនៅក្នុងតំបន់ La Libertad ។ នៅពេលទៅដល់ទីក្រុង Lima លោក Marinos ត្រូវបានស្វាគមន៍ដោយ ប្រធានាធិបតីលោក Jeri នៅវិមានរដ្ឋាភិបាល ខណៈហ្វូងអ្នកគាំទ្រនិងអ្នកតវ៉ា រួមទាំងសមាជិកក្រុម Gen Z បានធ្វើបាតុកម្មប្រឆាំងនឹងរដ្ឋបាលថ្មី។

ការតែងតាំងលោក Jeri កាលពីល្ងាចថ្ងៃព្រហស្បតិ៍ ទី៩ ខែតុលា បន្ទាប់ពីដាក់ការចោទប្រកាន់ទម្លាក់តំណែងភ្លាមៗរបស់អ្នកកាន់តំណែងមុនរបស់លោក បណ្តាលឱ្យមានការមិនសប្បាយចិត្តបន្ថែមទៀតនៅក្នុងប្រទេសដែលមានភាពតានតឹងដោយការកើនឡើងឧក្រិដ្ឋកម្ម និងការចោទប្រកាន់ពីអំពើពុករលួយ។

ប្រព័ន្ធផ្សព្វផ្សាយក្នុងស្រុកដែលដកស្រង់ប្រភពដឹងផ្ទាល់អំពីបញ្ហានេះបានចោទប្រកាន់លោក ប្រធានាធិបតីពីបទស្នើសុំឱ្យក្រុមហ៊ុនបង់ប្រាក់ជាថ្នូរនឹងការអនុគ្រោះ។ ប៉ុន្តែ លោក Jeri បានច្រានចោលការចោទប្រកាន់នេះ ហើយបានបង្ហាញឆន្ទៈក្នុងការសហការជាមួយនឹងការស៊ើបអង្កេតណាមួយ។