ប្រធានាធិបតីអ៊ីស្រាអែល លោក Isaac Herzog នៅថ្ងៃចន្ទ (ទី១៣ ខែតុលា) នេះ បាននិយាយថា លោកនឹងប្រគល់រង្វាន់ជនស៊ីវិលខ្ពង់ខ្ពស់បំផុតរបស់ប្រទេសនេះដល់សមភាគីអាមេរិក គឺលោក Donald Trump ដោយសារតួនាទីរបស់លោក ក្នុងការធានាបាននូវការដោះលែងចំណាប់ថ្នូរពីតំបន់ហ្កាហ្សា និងជួយនាំឲ្យសង្រ្គាមឈានដល់ទីបញ្ចប់។

លោក Herzog បានឲ្យដឹងនៅក្នុងសេចក្តីថ្លែងការណ៍មួយថា៖ «តាមរយៈការខិតខំប្រឹងប្រែងមិនមានភាពនឿយហត់របស់លោក លោកប្រធានាធិបតី Trump មិនត្រឹមតែបានជួយនាំមនុស្សជាទីស្រលាញ់របស់យើងឲ្យបានវិលមកផ្ទះសម្បែងវិញប៉ុណ្ណោះទេ ប៉ុន្តែថែមទាំងបានចាប់ផ្ដើមបង្កើតគ្រឹះ សម្រាប់យុគសម័យថ្មី នៅតំបន់មជ្ឈិមបូព៌ា ដែលត្រូវបានកសាងឡើងដោយផ្អែកលើសន្តិសុខ កិច្ចសហប្រតិបត្តិការ និងក្តីសង្ឃឹមពិតប្រាកដ សម្រាប់អនាគតប្រកបដោយសន្តិភាព»។ វានឹងក្លាយជាកិត្តិយសដ៏ធំអស្ចារ្យ សម្រាប់ខ្ញុំ ដែលនឹងបំពាក់គ្រឿងឥស្សរយសជូនលោក ក្នុងនាមជាប្រធានាធិបតីអ៊ីស្រាអែល»។

លោក Herzog បាននិយាយថា រង្វាន់ដ៏មានកិត្តិយសនេះនឹងត្រូវបានប្រគល់ជូន នៅ «ប៉ុន្មានខែខាងមុខ» ហើយថា លោកនឹងជូនដំណឹងដល់លោក Trump អំពីការសម្រេចចិត្តរបស់លោក នៅពេលដែលប្រធានាធិបតីសហរដ្ឋអាមេរិកទៅបំពេញទស្សនកិច្ច នៅអ៊ីស្រាអែល នាថ្ងៃចន្ទ (ទី១៣ ខែតុលា) នេះ។

គួរបញ្ជាក់ថា ផែនការ ២០ចំណុចរបស់លោក Trump មានគោលបំណងបញ្ចប់សង្រ្គាមជាង ២ឆ្នាំ រវាងអ៊ីស្រាអែល និងក្រុមហាម៉ាស។

ប្រធានាធិបតីអ៊ីស្រាអែល បានបញ្ជាក់បន្ថែមថា រង្វាន់ប្រគល់ដោយប្រធានាធិបតីអ៊ីស្រាអែលនេះ ត្រូវបានជូនដល់បុគ្គលដែលបានចូលរួមចំណែកដ៏វិសេសវិសាលដល់រដ្ឋអ៊ីស្រាអែល ឬចំពោះមនុស្សជាតិ។ អ៊ីស្រាអែលធ្លាប់បានបំពាក់មេដាយកិត្តិយសនេះដល់អតីតប្រធានាធិបតីអាមេរិក លោក Barack Obama ក្នុងឆ្នាំ២០១៣៕