បណ្តាប្រទេសជាសមាជិកសហភាពអឺរ៉ុប (EU) បានចាប់ផ្តើមដាក់ឱ្យដំណើរការជាបណ្តើរៗនូវប្រព័ន្ធច្រកព្រំដែនចេញចូលឌីជីថលថ្មី កាលពីថ្ងៃអាទិត្យ (១២ តុលា) នៅព្រំដែនខាងក្រៅរបស់ប្លុកនេះ ដោយដំណើរការចុះឈ្មោះតាមបណ្ដាញអេឡិចត្រូនិចសម្រាប់ទិន្នន័យរបស់ជនជាតិមិនមែនសហភាពអឺរ៉ុប។

ប្រព័ន្ធចូល/ចេញ (EES) ស្វ័យប្រវត្តិ ដែលតម្រូវឱ្យអ្នកធ្វើដំណើរចុះឈ្មោះនៅព្រំដែនដោយការស្កែនលិខិតឆ្លងដែន និងស្នាមម្រាមដៃ និងរូបថតរបស់ពួកគេ នឹងត្រូវបានដាក់ចេញជាផ្លូវការពេញលេញក្នុងរយៈពេល ៦ខែ។

ចំណាត់ការនេះមានគោលបំណងត្រួតពិនិត្យអ្នកស្នាក់នៅលើសកាលបរិច្ឆេទកំណត់ ដោះស្រាយរឿងក្លែងបន្លំអត្តសញ្ញាណ និងទប់ស្កាត់ការធ្វើអន្តោប្រវេសន៍ខុសច្បាប់ ស្របពេលមានសម្ពាធខ្លាំងក្នុងប្រទេសមួយចំនួនរបស់សហភាពអឺរ៉ុប ឱ្យអ្នកនយោបាយប្រកាន់ជំហរតឹងរ៉ឹងជាងមុនលើបញ្ហានេះ។

ពលរដ្ឋដែលមិនមែនសហភាពអឺរ៉ុប នឹងត្រូវចុះព័ត៌មានលម្អិតផ្ទាល់ខ្លួនរបស់ពួកគេ នៅពេលចូលទៅក្នុងតំបន់ ស្ហ៊ែង៉ិន (Schengen) ជាលើកដំបូង - ពោលគឺប្រទេសជាសមាជិក EU ទាំងអស់ ក្រៅពីអៀរឡង់ និងស៊ីប ប៉ុន្តែរួមមានអ៊ីស្លង់ ន័រវែស ស្វីស និងលិចតិនស្តាញ។ EU និយាយថា ប្រព័ន្ធនេះគួរតែដំណើរការពេញលេញ ជាមួយនឹងការបោះត្រាលិខិតឆ្លងដែនផ្ទាល់ដៃត្រូវជំនួសទៅជាត្រាអេឡិចត្រូនិក នៅថ្ងៃទី១០ ខែមេសា ឆ្នាំ២០២៦ តទៅ៕