អ្នកការទូតជាន់ខ្ពស់របស់សហភាពអឺរ៉ុប (EU) នាថ្ងៃចន្ទ (ទី១៣ ខែតុលា) នេះ បានឲ្យដឹងថា ប្លុកនឹងចាប់ផ្តើមបេសកកម្មស៊ីវិលឡើងវិញ នៅថ្ងៃពុធ ដើម្បីត្រួតពិនិត្យច្រកព្រំដែន Rafah រវាងតំបន់ហ្កាហ្សា និងប្រទេសអេហ្ស៊ីប ដើម្បីជួយគាំទ្រដល់កិច្ចព្រមព្រៀងបទឈប់បាញ់ដែលសម្របសម្រួលដោយសហរដ្ឋអាមេរិក។

បន្ទាប់ពីក្រុមហាម៉ាស បានដោះលែងចំណាប់ថ្នូរអ៊ីស្រាអែលក្រុមដំបូងដែលជាផ្នែកនៃកិច្ចព្រមព្រៀងនោះ លោកស្រី Kaja Kallas បានបង្ហោះសារនៅលើបណ្ដាញសង្គម X ថា៖ «EU បានត្រៀមរួចជាស្រេច ក្នុងការបំពេញនូវចំណែករួមរបស់ខ្លួន»។ លោកស្រីបានបញ្ជាក់ថា៖ «បេសកកម្មនេះអាចដើរតួនាទីយ៉ាងសំខាន់ ក្នុងការជួយគាំទ្របទឈប់បាញ់»។

គួររំលឹកថា ប្លុកដែលមានសមាជិក ២៧ប្រទេសនេះ បានបង្កើតបេសកកម្មស៊ីវិល ក្នុងឆ្នាំ២០២៥ ដើម្បីជួយត្រួតពិនិត្យការឆ្លងកាត់ព្រំដែន Rafah ប៉ុន្តែវាត្រូវបានផ្អាក ២ឆ្នាំក្រោយមក បន្ទាប់ពីក្រុមសកម្មប្រយុទ្ធហាម៉ាស បានកាន់កាប់តំបន់ហ្កាហ្សា។

បេសកកម្មត្រួតពិនិត្យឈ្មោះ EUBAM មានគោលបំណងផ្តល់នូវវត្តមានភាគីទី៣ ដែលមានភាពអព្យាក្រឹត នៅឯច្រកឆ្លងកាត់ដ៏សំខាន់ និងពាក់ព័ន្ធនឹងនគរបាលមកពីប្រទេសអ៊ីតាលី អេស្ប៉ាញ និងបារាំង។ អង្គភាពនេះត្រូវបានដាក់ឲ្យប្រតិបត្តិការឡើងវិញបណ្ដោះអាសន្ន កាលពីខែមករា ប៉ុន្តែត្រូវបានផ្អាកម្តងទៀត នៅក្នុងខែមីនា។

ដោយស្វាគមន៍ដល់ការដោះលែងចំណាប់ថ្នូរ នៅថ្ងៃចន្ទនេះ លោកស្រី Kallas បានលើកឡើងពីតួនាទីរបស់ប្រធានាធិបតីអាមេរិក លោក Donald Trump នៅក្នុង «ព្រឹត្តិការណ៍ដ៏សំខាន់បំផុតឆ្ពោះទៅរកសន្តិភាព» ដោយនិយាយថា មេដឹកនាំរូបនេះ «បានបង្កើតឲ្យមានលទ្ធភាពទម្លាយភាពទាល់ច្រក»៕