ដើម្បីគាំទ្រដល់ការបង្កើនទំហំប្រតិបត្តិការមនុស្សធម៌បន្ទាន់ អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងជាអ្នកសម្របសម្រួលជំនួយសង្គ្រោះបន្ទាន់ លោក Tom Fletcher កាលពីថ្ងៃចន្ទ បានលៃលកមូលនិធិផ្តល់ជំនួយបន្ថែមចំនួន១១លានដុល្លារអាមេរិកដល់តំបន់ហ្កាហ្សាស្ទ្រីប។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) ដឹកនាំដោយ លោក Fletcher បាននិយាយថា ចំនួនមូលនិធិនេះគឺបន្ថែមទៅលើមូលនិធិ៩លានដុល្លារដែលត្រូវបានរៀបចំកាលពីសប្តាហ៍មុនពីមូលនិធិឆ្លើយតបគ្រាអាសន្នកណ្តាល (CERF) សម្រាប់តំបន់ហ្កាហ្សា។ ទោះជាយ៉ាងណា លោក Fletcher បានព្រមានថា បើគ្មានការរួមចំណែកថ្មីៗចំពោះមូលនិធិឆ្លើយតបគ្រាអាសន្នកណ្តាល (CERF) ទេ នោះជំនួយសំខាន់មិនអាចបន្តហូរទៅដល់អ្នកដែលពឹងផ្អែកលើជំនួយបានទេ។

អង្គការOCHA បាននិយាយថា ក្រោមផែនការមនុស្សធម៌សម្រាប់រយៈពេល៦០ថ្ងៃដំបូងនៃបទឈប់បាញ់ អង្គការសហប្រជាជាតិ និងដៃគូរបស់ខ្លួននឹងផ្តល់ជំនួយសង្គ្រោះជីវិត និងសេវានានាដល់ប្រជាជននៅទូទាំងតំបន់ហ្កាហ្សា នៅគ្រប់ទីកន្លែងដែលពួកគេត្រូវការការគាំទ្រ។ ជំនួយនេះ នឹងរួមបញ្ចូលទាំងស្បៀងអាហារ ទឹក សេវាសុខភាព ការផ្គត់ផ្គង់កន្លែងស្នាក់នៅ សម្ភារៈអនាម័យ ជំនួយការពារ និងជំនួយសំខាន់ៗផ្សេងទៀត។