ជម្លោះសងសឹកគ្នាទៅវិញទៅមកចុងក្រោយបង្អស់របស់ប្រធានាធិបតីអាមេរិក លោក Donald Trump និងមេដឹកនាំចិន លោក Xi Jinping បានឈានដល់ការប្រឈមមុខដាក់គ្នា កាលពីថ្ងៃចន្ទ (ទី១៣ ខែតុលា) ដោយប្រទេសទាំង២ បានអះអាងថា ភាគីម្ខាងទៀត គឺជាអ្នកត្រូវចាត់វិធានការ។

បន្ទាប់ពីលោក Trump បានបង្ហាញពីការបើកចំហធ្វើកិច្ចព្រមព្រៀងជាមួយទីក្រុងប៉េកាំង អនុប្រធានាធិបតីអាមេរិក លោក J.D. Vance កាលពីថ្ងៃទី១២ ខែតុលា បានប្រកាសថា លទ្ធផលនេះ នឹង «អាស្រ័យលើថា តើចិនឆ្លើយតបយ៉ាងដូចម្ដេច»។ តែប៉ុន្មានម៉ោងក្រោយមក ក្រសួងការបរទេសចិន បានបញ្ជាក់យ៉ាងច្បាស់ថា ទីក្រុងប៉េកាំង នឹងចាត់វិធានការរបស់ខ្លួនតាមជំហានបន្ទាប់របស់ទីក្រុងវ៉ាស៊ីនតោន បន្ទាប់ពីបានបញ្ចេញនូវអ្វីដែលខ្លួនមើលឃើញថា ជាសកម្មភាពសងសឹករួចហើយនោះ។

អ្នកនាំពាក្យក្រសួងការបរទេសចិនលោក Lin Jian បាននិយាយនៅឯសន្និសីទកាសែតប្រចាំថ្ងៃ ក្នុងទីក្រុងប៉េកាំងថា៖ «ប្រសិនបើសហរដ្ឋអាមេរិកបន្តខុសទិសដៅ ចិននឹងចាត់វិធានការចាំបាច់ ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន»។ អាជ្ញាធរចិនមិនទាន់បានចេញចំណាត់ការសងសឹកនៅឡើយទេ ចំពោះការគំរាមរបស់លោក Trump ក្នុងការដាក់អត្រាពន្ធ ១០០ភាគរយ ពាក់ព័ន្ធនឹងការទប់ស្កាត់ចុងក្រោយបំផុតរបស់ខ្លួន លើការនាំចេញរ៉ែកម្រ ដោយសារកាតព្វកិច្ចពន្ធនោះមិនទាន់ត្រូវបានប្រកាសជាផ្លូវការ។

ទីផ្សាររបស់ចិន បានបង្ហាញពីភាពធន់នឹងភាពចលាចលនេះ។ សន្ទស្សន៍ CSI 300 សម្រាប់ភាគហ៊ុនក្នុងប្រទេស បានបញ្ចប់ការជួញដូរ ដោយធ្លាក់ចុះត្រឹមតែ ០,៥ភាគរយ ដែលបង្ហាញថា អ្នកវិនិយោគមើលឃើញភាពតានតឹងថ្មីនេះថា គ្រាន់តែជាយុទ្ធសាស្ត្រ។ ចំណែកទីផ្សារភាគហ៊ុនរបស់អាមេរិក ក៏ត្រូវបានរំពឹងហក់ឡើងវិញ បន្ទាប់ពីបានធ្លាក់ចុះកាលពីថ្ងៃទី១០ ខែតុលា ដោយសារលោក Trump បន្ទន់សំឡេងរបស់លោក។

បណ្ដាអ្នកវិភាគ រួមទាំងនៅក្រុមហ៊ុន Nomura Holdings បានលើកឡើងថា ប្រទេសដែលមានសេដ្ឋកិច្ចធំបំផុតរបស់ពិភពលោកទាំង២ មានលទ្ធភាពខ្ពស់ក្នុងការមិនលុបចោលកិច្ចប្រជុំរបស់មេដឹកនាំខ្លួន ក្នុងខែតុលា នៅប្រទេសកូរ៉េខាងត្បូង។ ដោយគូសបញ្ជាក់ពីចំណុចនោះ រដ្ឋមន្ត្រីក្រសួងរតនាគារ លោក Scott Bessent បាននិយាយកាលពីថ្ងៃចន្ទថា លោកជឿថា កិច្ចប្រជុំ Trump-Xi «នឹងនៅតែកើតឡើង»។

ទន្ទឹមនឹងនោះ លោក Bessent រំពឹងថា នឹងមានជំនួបកម្រិតបុគ្គលិកអាមេរិក-ចិន នៅសប្តាហ៍នេះ ក្នុងនោះរួមជាមួយនឹងចំណាត់ការរបស់រដ្ឋបាល Trump ក្នុងការប្រមូលផ្តុំសម្ព័ន្ធមិត្តរបស់សហរដ្ឋអាមេរិក ដើម្បីដាក់សម្ពាធលើទីក្រុងប៉េកាំង។ សម្រាប់មន្ត្រីចិន ពួកគេបានបញ្ជាក់ថា អាចមាន «ការលើកលែង» សម្រាប់ការទប់ស្កាត់រ៉ែកម្ររបស់ពួកគេ ដើម្បីជួយសម្រួលដល់ពាណិជ្ជកម្ម៕