ប្រធានាធិបតីអាមេរិក លោក Donald Trump បាននិយាយថា លោកត្រៀមផ្តោតលើការបញ្ចប់សង្រ្គាមរបស់រុស្ស៊ី នៅអ៊ុយក្រែន បន្ទាប់ពិដំណាក់កាលទី១ នៃកិច្ចព្រមព្រៀងឈប់បាញ់របស់លោក នៅតំបន់ហ្កាហ្សា គឺស្ថិតនៅក្នុងដំណាក់កាលចុងក្រោយរបស់វា។

កាលពីថ្ងៃចន្ទ (ទី១៣ ខែតុលា) ក្រុមហាម៉ាសបានដោះលែងចំណាប់ថ្នូរជនជាតិអ៊ីស្រាអែលនៅរស់ទាំង ២០នាក់ ខណៈដែលអ៊ីស្រាអែល បានដោះលែងជនជាតិប៉ាឡេស្ទីនជិត ២.០០០នាក់ ដែលត្រូវបានឃុំខ្លួននៅក្នុងពន្ធនាគាររបស់ខ្លួន។ ដំណើរការនេះកើតមានឡើងបន្ទាប់ពីភាគីទាំង២ បានយល់ព្រមបញ្ចប់អរិភាព កាលពីថ្ងៃទី១០ ខែតុលា។

បទឈប់បាញ់ដែលអាចកើតមាន សម្រាប់អ៊ុយក្រែន និងជំហានបន្ទាប់ ទំនងជានឹងត្រូវបានពិភាក្សា នៅក្នុងកិច្ចប្រជុំ រវាងលោក Volodymyr Zelenskyy និងលោក Trump នាថ្ងៃសុក្រ ក្នុងទីក្រុងវ៉ាស៊ីនតោន តាមការបញ្ជាក់របស់ប្រធានាធិបតីអ៊ុយក្រែន។

លោក Zelenskyy បានប្រាប់អ្នកសារព័ត៌មានកាលពីថ្ងៃចន្ទថា៖ «ខ្ញុំគិតថា យើងចាំបាច់ត្រូវពិភាក្សា អំពីជំហានបន្តបន្ទាប់ដែលខ្ញុំចង់ស្នើទៅលោកប្រធានាធិបតី (Trump)»។

អំឡុងពេលថ្លែងទៅកាន់សភាអ៊ីស្រាអែល កាលពីថ្ងៃចន្ទ លោក Trump បានបញ្ជាក់ថា កិច្ចខិតខំប្រឹងប្រែងបង្កើតសន្តិភាពរបស់លោក មិនទាន់ចប់នៅឡើយទេ ហើយបន្ទាប់ទៀត លោកចង់ឲ្យរុស្ស៊ីបញ្ចប់សង្គ្រាម លើអ៊ុយក្រែន។ ក្នុងសុន្ទរកថាជ័យជម្នះរបស់លោក នៅឯសភា Knesset លោក Trump បាននិយាយ៖ «វានឹងក្លាយជារឿងអស្ចារ្យ ប្រសិនបើលោកមានកិច្ចព្រមព្រៀងជាមួយអ៊ីរ៉ង់» តែលោកបានបញ្ជាក់ថា៖ «ជាដំបូង យើងត្រូវតែធ្វើឲ្យសម្រេចបានជាមួយរុស្ស៊ីសិន។ យើងត្រូវផ្តោតលើរុស្ស៊ីជាមុនសិន»។

គួរបញ្ជាក់ថា លោក Trump បានព្យាយាមសម្រុះសម្រួលឲ្យមានកិច្ចព្រមព្រៀងបទឈប់បាញ់ រវាងរុស្ស៊ី និងអ៊ុយក្រែនអស់ជាច្រើនខែមកហើយ ប៉ុន្តែកិច្ចខិតខំប្រឹងប្រែងរបស់លោក នៅតែរកច្រកចេញមិនឃើញ ដោយវិមានក្រឹមឡាំង បានច្រានចោលគំនិតនៃការចរចាដោយផ្ទាល់ជាមួយលោក Zelenskyy ទោះបីជាមានការចូលរួមពីលោក Trump ក្នុងនាមជាអ្នកសម្របសម្រួលក៏ដោយ៕