នៅទីក្រុងវ៉ាស៊ីនតោន នាថ្ងៃអង្គារ (ទី១៤ ខែតុលា) នេះ នៅមុនមានទស្សនកិច្ចផ្លូវការរបស់លោកនាយករដ្ឋមន្ត្រី Anthony Albanese នាសប្ដាហ៍ក្រោយ រដ្ឋមន្ត្រីឧស្សាហកម្មការពារជាតិ លោក Pat Conroy បាននិយាយថា អូស្ត្រាលីនឹងទូទាត់ប្រាក់ ១ពាន់លានដុល្លារលើកទី២ ដើម្បីលើកកម្ពស់ទីតាំងផលិតនាវាមុជទឹកនុយក្លេអ៊ែររបស់សហរដ្ឋអាមេរិក ក្នុងពេលឆាប់ៗនេះ។

កិច្ចព្រមព្រៀងនៃសម្ព័ន្ធ Aukus ក្នុងការផ្ទេរនាវាមុជទឹកដើរដោយថាមពលនុយក្លេអ៊ែរទៅអូស្ត្រាលី កំពុងត្រូវបានពិនិត្យដោយមន្ទីរបញ្ចកោណ ទោះបីជាអូស្ត្រាលីបានបង្ហាញកា[រជឿជាក់ថា កិច្ចព្រមព្រៀង ដែលរួមមានទាំងចក្រភពអង់គ្លេសដែរនោះ នឹងដំណើរការក៏ដោយ។

នៅដំណាក់កាលដំបូងរបស់ខ្លួន អូស្ត្រាលីបានសន្យាផ្តល់ប្រាក់ចំនួន ៣ពាន់លានដុល្លារ ដើម្បីបង្កើនអត្រាផលិតកម្មនាវាមុជទឹករបស់សហរដ្ឋអាមេរិក ដែលក្រោយមកនឹងអនុញ្ញាតឲ្យមានការលក់នាវាមុជទឹក Virginia ចំនួន ៣គ្រឿង ទៅឲ្យទីក្រុង Canberra ដោយមានកាលកំណត់នៅឆ្នាំ២០២៥ សម្រាប់ការទូទាត់ ២ពាន់លានដុល្លារដំបូង។

នៅទីក្រុងវ៉ាស៊ីនតោន ជាកន្លែងដែលលោកបាននិយាយថា លោកកំពុងជួបជាមួយរដ្ឋបាលរបស់លោក Donald Trump និងបណ្ដាមន្ត្រីឧស្សាហកម្មការពារជាតិ លោក Conroy បានប្រាប់អ្នកសារព័ត៌មានថា៖ «យើងបានទូទាតស់ ១ពាន់លានដុល្លារហើយ។ ផែនការនេះ គឺដើម្បីផ្តល់ប្រាក់ ១ពាន់លានដុល្លារផ្សេងទៀត ក្នុងពេលឆាប់ៗនេះ»។

លោក Albanese នឹងធ្វើដំណើរទៅកាន់ទីក្រុងវ៉ាស៊ីនតោន នៅសប្តាហ៍ក្រោយ សម្រាប់ដំណើរទស្សនកិច្ចផ្លូវការ និងកិច្ចប្រជុំផ្លូវការលើកដំបូងរបស់លោកជាមួយប្រធានាធិបតីអាមេរិក លោក Trump ដោយភាពជាដៃគូការពារជាតិសម្ព័ន្ធ Aukus ត្រូវបានគេរំពឹងថា នឹងក្លាយជាចំណុចផ្តោតសំខាន់ សម្រាប់ការពិភាក្សា៕