​បាល់ទាត់៖ ​ការប្រកួត​បាល់ទាត់​ស្ត្រី​ជើងឯក​អាស៊ី AFC Women Asian Cup បាន​រកឃើញ​ពីរ​ក្រុម​ឡើង​វគ្គ​ផ្តាច់ព្រ័ត្រ​ហើយ​គឺ​ចិន និង​កូរ៉េខាងត្បូង​។ ​ក្រុម​ជើងឯក ៨​សម័យ​ចិន​បាន​យកឈ្នះ​ក្រុម​ជើងឯក ២លើក​ជប៉ុន​យ៉ាង​តានតឹង​នៅ​វគ្គ ១១ម៉ែត្រ​កាត់សេចក្តី​។ ​​ជប៉ុន​បាន​បើក​ការនាំ​មុខមុន​នៅ​នាទី​ទី​២៦ ដោយ Riko Ueki តែ​ចិន​តាម​ស្មើ​វិញ​នៅ​ដើម​វគ្គ​ទី២ ដោយ Wu Chengshu នាទី​ទី៤៦​។

​ក្រុម​ទាំងពីរ​បន្ត​ស្មើគ្នា​រហូត​ចប់ ៩០នាទី​មុន​ពេល​ដែល​ជប៉ុន​នាំមុខ​សារជាថ្មី​ក្នុង​ម៉ោង​បន្ថែម​នៅ​នាទី​ទី១០៣ ដោយ Riko Ueki ដដែល​តែ​មិន​មែន​ជា​គ្រាប់​ជ័យជំនះ​របស់​ជប៉ុន​ឡើយ ​ពោល​គឺ​ចិន​ក៏​តាម​ស្មើ​ម្តង​ទៀត​នៅ​នាទី​ទី១១៩ ហៀបនឹង​ចប់​ទៅ​ហើយ​ដោយ Wang Shanshan​។​ ​ឈាន​ដល់​វគ្គ ១១​ម៉ែត្រ​កាត់សេចក្តី​ចិន​បាន​យកឈ្នះ ៤-៣ បន្ទាប់ពី​ក្រុម​ទាំងពីរ​ស៊ុត​មិន​ចូល​គ្រាប់​ដំបូង​ដូចគ្នា​ តែជប៉ុន​ស៊ុត​មិន​ចូល​គ្រាប់​ចុងក្រោយ​មួយទៀត​។ ​ជ័យជំនះ​ធ្វើឱ្យ​ចិន​ឈានឡើង​វគ្គ​ផ្តាច់ព្រ័ត្រ​លើក​ទី១១ ក្នុង​ប្រវត្តិសាស្ត្របន្ត​ស្វែងរក​ជើងឯក​លើក​ទី៩ ផង​ដែរ​។​

​​គូប្រកួត​របស់​ចិន​គឺ​កូរ៉េ​ដែល​បាន​យកឈ្នះ​ហ្វីលីពីន ២-០ នៅ​វគ្គ​ពាក់កណ្តាល​ផ្តាច់ព្រ័ត្រ​ម្សិលមិញ​ផងដែរ​។ ​កីឡាការិនី Cho So-hyun និង Son Hwa-yeon រកបាន​ម្នាក់​ ១គ្រា​ប់​ជួយ​ឱ្យ​កូរ៉េ​ឡើង​វគ្គ​ផ្តាច់ព្រ័ត្រ​ជើងឯក​អាស៊ី​ជា​លើកដំបូង​។ ​វគ្គ​ផ្តាច់ព្រ័ត្រ​នឹងធ្វើ​ឡើង​នៅ​ថ្ងៃអាទិត្យ​ ទី៦ ខែកុម្ភៈ​នេះ​នៅ​កីឡដ្ឋាន DY Patil ទីក្រុង Mumbai ប្រទេស​ឥណ្ឌា​៕

​អត្ថបទ​៖​នាង សុភា​វុ​ធ