ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានមានប្រសាសន៍ជំរុញឱ្យក្រសួងសុខាភិបាល ក្រសួងស្ថាប័នពាក់ព័ន្ធ គ្រប់រាជធានី ខេត្ត ក្រុង ស្រុក ខណ្ឌ ឃុំ សង្កាត់ ត្រូវខិតខំបន្តពន្លឿនការចាក់វ៉ាក់សាំងដូសជំរុញជាដូសទី៣ ជូនប្រជាពលរដ្ឋឱ្យបានគ្រប់ៗគ្នា ព្រមទាំងអំពាវនាវដល់ប្រជាពលរដ្ឋដែលមិនទាន់បានចាក់វ៉ាក់សាំងនៅឡើយ ត្រូវមកទទួលការចាក់វ៉ាក់សាំងឱ្យបានឆាប់រហ័ស នៅតាមទីតាំងដែលបានរៀបចំ ដើម្បីបង្កើនភាពស៊ាំនៅក្នុងសហគមន៍។​

សម្តេចតេជោ បានមានប្រសាសន៍លើកឡើងយ៉ាងដូច្នះ ខណៈអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រីនាព្រឹកថ្ងៃទី៤ កុម្ភៈដើម្បីពិភាក្សានិងឆ្លងសេចក្តីព្រាងច្បាប់ការការពាររុក្ខជាតិនិងភូតគាមអនាម័យនិងបញ្ហាផ្សេងៗ។ ការដែលសម្តេចបានជំរុញឱ្យក្រសួងសុខាភិបាលនិងស្ថាប័នពាក់ព័ន្ធបែបនេះដើម្បីឆ្លើយតបនឹងការបើកដំណើរការសេដ្ឋកិច្ច សង្គម ឡើងវិញក្នុងគន្លងប្រក្រតីភាពថ្មី។

សម្តេចបន្តថា រាជរដ្ឋាភិបាលកម្ពុជាបន្តជំរុញយុទ្ធនាការចាក់វ៉ាក់សាំងដូសជំរុញទី៤ ជូនមន្ត្រីរាជការ ក ងកម្លាំងប្រដាប់អាវុធ និងប្រជាពលរដ្ឋនៅរាជធានីភ្នំពេញ និងតាមបណ្ដាខេត្តនានានៅពេលណាដែល ទទួលបាននូវបរិក្ខារប្រព័ន្ធត្រជាក់សម្រាប់រក្សាទុកវ៉ាក់សាំងបានត្រឹមត្រូវ។

រាជរដ្ឋាភិបាលកម្ពុជា ខិតខំបញ្ចៀសមិនឱ្យមានករណីស្លាប់ជាបន្តទៀតដោយសារជំងឺកូវីដ-១៩ ដោយធានាថា កម្ពុជានឹងមិនខ្វះវ៉ាក់សាំងសម្រាប់ចាក់ជូនប្រជាពលរដ្ឋ នៅពេលដែលបញ្ហាជំងឺកូវីដ-១៩ មិនទាន់ចប់នៅឡើយ។

សេចក្តីជូនព័ត៌មានរបស់ក្រសួងសុខាភិបាលស្តីពីការសរុបស្ថានភាពជំងឺកូវីដ-១៩ នៅកម្ពុជាសម្រាប់ថ្ងៃទី០៣ ខែកុម្ភះ ឆ្នាំ២០២២ បានឱ្យដឹងថា មានករណីឆ្លងថ្មី ៦៦នាក់ ដែលជាលទ្ធផលបញ្ជាក់ដោយ PCR, ករណីជាសះស្បើយ ៩៨នាក់, ករណីស្លាប់ដោយជំងឺនេះ មិនមាន។

រីឯកំណើនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី០៣ ខែកុម្ភះ ឆ្នាំ២០២២

-លើប្រជាជនអាយុពី ១៨ឆ្នាំឡើង មានចំនួន ១០២,០៥% ធៀបជាមួយចំនួនប្រជាជនគោលដៅ ១០លាននាក់។

-លើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៩៩,៥៦% ធៀបជាមួយចំនួនគោលដៅ ១,៨២៧,៣៤៨ នាក់។

-លើកុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០៥,៩៩% ធៀបជាមួយនឹងគោលដៅ ១,៨៩៧, ៣៨២ នាក់។

-លើកុមារអាយុ ០៥ឆ្នាំ មាន ១០៦,៤៦% ធៀបជាមួយនឹងគោលដៅ ៣០៤,៣១៧ នាក់។

-លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាន នាក់មាន ៨៩,៧៤% ៕​ ដោយ៖ មុត សុទ្ធ