គណៈកម្មាធិការអន្តរជាតិនៃកាកបាទក្រហម (ICRC) នៅថ្ងៃអង្គារ (ទី១៤ ខែតុលា) នេះ បានប្រាប់ឲ្យដឹងថា វានឹងត្រូវការពេលវេលា ក្នុងការប្រគល់អដ្ឋិធាតុចំណាប់ថ្នូរ និងអ្នកជាប់ឃុំដែលត្រូវបានសម្លាប់ នៅក្នុងសង្គ្រាម រវាងអ៊ីស្រាអែល និងក្រុមហាម៉ាស ដោយហៅដំណើរការនេះថា ជា «បញ្ហាប្រឈមដ៏ធំ» ដោយសារការលំបាកក្នុងការស្វែងរកសាកសព នៅក្នុងគំនរបាក់បែករបស់តំបន់ហ្កាហ្សា។

ក្រុមហាម៉ាសបានដោះលែងចំណាប់ថ្នូរអ៊ីស្រាអែលនៅរស់ចុងក្រោយ ពីតំបន់ហ្កាហ្សា កាលពីថ្ងៃចន្ទ ក្រោមកិច្ចព្រមព្រៀងបទឈប់បាញ់ ហើយអ៊ីស្រាអែលបានបញ្ជូនរថយន្តក្រុងដឹកអ្នកជាប់ឃុំប៉ាឡេស្ទីនទៅកាន់ផ្ទះសម្បែងរបស់ពួកគេ ខណៈដែលប្រធានាធិបតីអាមេរិកលោក Donald Trump បានប្រកាសបញ្ចប់សង្គ្រាមរយៈពេល ២ឆ្នាំ។

ប៉ុន្តែរហូតមកទល់ពេលនេះ មានតែមឈូសចំនួន ៤ ប៉ុណ្ណោះដែលមានចំណាប់ថ្នូរបានបាត់បង់ជីវិត ត្រូវបានប្រគល់ឲ្យអ៊ីស្រាអែលវិញ ដោយធ្វើឲ្យសាកសពជាង ២០រូបផ្សេងទៀត មិនទាន់ត្រូវបានគេរកឃើញ ហើយប្រគល់មកវិញនៅឡើយទេ។

អ្នកនាំពាក្យរបស់ ICRC លោក Christian Cardon បាននិយាយថា «នោះជាបញ្ហាប្រឈមដ៏ធំ ជាងការដោះលែងមនុស្សនៅរស់ទៅទៀត» ដោយលោកបានបញ្ជាក់ថា វាអាចចំណាយពេលច្រើនថ្ងៃ ឬច្រើនសប្តាហ៍ ហើយវាក៏អាចផងដែរដែលសាកសពទាំងនោះមិនត្រូវបានរកឃើញ។

លោកបានបន្ថែមថា៖ «ខ្ញុំគិតថា មានហានិភ័យយ៉ាងច្បាស់លាស់ ដែលនឹងត្រូវចំណាយពេលបន្ថែមទៀត។ អ្វីដែលយើងកំពុងប្រាប់ភាគីនានា គឺថា នោះគួរតែជាអាទិភាពធំជាងគេបំផុតរបស់ពួកគេ»។

យ៉ាងណាក្ដី លោកបានបដិសេធមិនឆ្លើយ អំពីព័ត៌មានលម្អិតបន្ថែម ទាក់ទងនឹងកន្លែងដែលអាចមានសាកសពចំណាប់ថ្នូរ ដោយលើកឡើងពីភាពរសើបនៃប្រតិបត្តិការដែលកំពុងបន្តមាន៕