ស្នងការសេដ្ឋកិច្ចរបស់អឺរ៉ុប លោក Valdis Dombrovskis បាននិយាយកាលពីថ្ងៃអង្គារ (១៤ តុលា) ថា សង្គ្រាមរបស់រុស្ស៊ីនៅអ៊ុយក្រែន គឺមិនល្អដល់អាជីវកម្មរបស់សហរដ្ឋអាមេរិកនោះទេ ខណៈទីក្រុងវ៉ាស៊ីនតោនបានវិនិយោគយ៉ាងច្រើននៅក្នុងទ្វីបអឺរ៉ុប ហើយប្រាក់ចំណេញរបស់ពួកគេត្រូវបានប៉ះពាល់ដោយភាពមិនច្បាស់លាស់ ដែលទីក្រុងមូស្គូបង្កឡើង។

ថ្លែងនៅវិទ្យាស្ថានសហគ្រាសអាមេរិក AEI នៅទីក្រុងវ៉ាស៊ីនតោន លោក Dombrovskis បាននិយាយថា នៅឆ្នាំ២០២៣ ទ្រព្យសម្បត្តិដែលគ្រប់គ្រងដោយអាមេរិកនៅអឺរ៉ុប មានតម្លៃប៉ាន់ស្មាន ១៩,២សែនកោដិដុល្លារ ឬប្រហែល ៦៤% នៃទ្រព្យសកម្មបរទេសសាជីវកម្ម របស់អាមេរិកទាំងអស់នៅទូទាំងពិភពលោក។ ការលក់ដោយសាខានៅអឺរ៉ុបរបស់ក្រុមហ៊ុនអាមេរិក មានចំនួន ៣,៩សែនកោដិដុល្លារ។

លោក Dombrovskis បានលើកឡើងថា "អឺរ៉ុប ដែលជាទីផ្សារ ទ្រព្យសម្បត្តិ និងតំណភ្ជាប់ដ៏សំខាន់មួយក្នុងបណ្ដាញផ្គត់ផ្គង់រួមបញ្ចូលគ្នា គឺធំខ្លាំងណាស់សម្រាប់ផលប្រយោជន៍សាជីវកម្មអាមេរិក ហើយមិនអាចមិនអើពើបានទេ"។ លោកបន្តថា ប្រតិបត្តិការយោធា ការគំរាមកំហែង សង្រ្គាម និងការវាយប្រហារកូនកាត់របស់រុស្ស៊ី លើហេដ្ឋារចនាសម្ព័ន្ធសំខាន់ៗ មិនត្រឹមតែជាឧក្រិដ្ឋកម្មគួរឱ្យស្អប់ខ្ពើម និងការប្រមាថខាងសីលធម៌ប៉ុណ្ណោះទេ ប៉ុន្តែក៏ជាផលអាក្រក់ដល់អាជីវកម្មផងដែរ ជាពិសេសសម្រាប់អាមេរិក"។

សហភាពអឺរ៉ុបមើលឃើញថា ប្រតិបត្តិការយោធាពិសេសទ្រង់ទ្រាយធំរបស់រុស្ស៊ីលើអ៊ុយក្រែន ចាប់តាំងពីខែកុម្ភៈ ឆ្នាំ២០២២មក គឺជាការគំរាមកំហែងដល់សន្តិសុខរបស់ខ្លួន ហើយបានបង្កើនកិច្ចខិតខំប្រឹងប្រែងការពារយ៉ាងខ្លាំង ដើម្បីទប់ស្កាត់លទ្ធភាពនៃការវាយប្រហារណាមួយនាពេលខាងមុខរបស់រុស្ស៊ី៕