អគ្គនាយកអង្គការសុខភាពពិភពលោក WHO លោក Tedros Adhanom Ghebreyesus បាននិយាយក្នុងសេចក្តីថ្លែងការណ៍មួយលើបណ្ដាញសង្គម X នៅថ្ងៃពុធ (១៥ តុលា) នេះថា បុគ្គលិក WHO មួយក្រុមបានរងការវាយប្រហារ ខណៈពេលអមដំណើរជាមួយក្បួនរថយន្តមនុស្សធម៌របស់អង្គការសហប្រជាជាតិ ក្នុងប្រទេសអ៊ុយក្រែន កាលពីថ្ងៃអង្គារ ប៉ុន្តែនៅតែអាចបន្តដំណើរទៅផ្តល់គ្រឿងផ្គត់ផ្គង់វេជ្ជសាស្ត្រដល់ទីក្រុង Bilozerka។

លោក Tedros បាននិយាយថា រថយន្តរបស់កម្មវិធីស្បៀងអាហារពិភពលោក WFP ចំនួនពីរគ្រឿង ត្រូវបានខូចខាតនៅក្នុងឧបទ្ទវហេតុនេះ ដោយអំពាវនាវជាថ្មីឱ្យការវាយប្រហារលើបុគ្គលិកមនុស្សធម៌ ត្រូវបញ្ចប់ជាបន្ទាន់។

ជាមួយគ្នានេះ ការិយាល័យទទួលបន្ទុកកិច្ចការមនុស្សធម៌ OCHA នៅអ៊ុយក្រែន បាននិយាយលើប្រព័ន្ធផ្សព្វផ្សាយសង្គមថា ក្បួនរថយន្តមនុស្សធម៌របស់ UN ត្រូវបានយានដ្រូនរបស់រុស្សីវាយប្រហារ ពេលកំពុងផ្តល់ជំនួយទៅកាន់តំបន់ជួរមុខមួយកន្លែងនៅភាគខាងត្បូងអ៊ុយក្រែន។

អ្នកសម្របសម្រួលមនុស្សធម៌របស់ OCHA នៅអ៊ុយក្រែន លោក Matthias Schmale បានរិះគន់ខ្លាំងៗលើការវាយប្រហារនេះ ដោយនិយាយថា ឧប្បត្តិហេតុបែបនេះគឺជាការរំលោភច្បាប់មនុស្សធម៌អន្តរជាតិយ៉ាងធ្ងន់ធ្ងរ ហើយអាចជាឧក្រិដ្ឋកម្មសង្គ្រាម៕