សមាជិកសភាមួយរូបមកពីបក្សប្រឆាំងរបស់កូរ៉េខាងត្បូង កាលពីថ្ងៃអង្គារ (១៤ តុលា) បានអះអាងថា កូរ៉េខាងជើង បានសាងសង់រនាំងប្រឆាំងរថក្រោះចម្ងាយប្រហែល ១០គីឡូម៉ែត្រ នៅជិតបណ្ដោយព្រំដែនអន្តរកូរ៉េ នេះបើយោងតាមទីភ្នាក់ងារសារព័ត៌មានយ៉ុនហាប់។

លោក Yu Yong-weon សមាជិកសភាមកពីគណបក្សអំណាចប្រជាជនរបស់កូរ៉េខាងត្បូង បាននិយាយថា រូបភាពផ្កាយរណប និងចារកម្មសម្ងាត់ពីនាយសេនាធិការចម្រុះបានបង្ហាញថា ទីក្រុងព្យុងយ៉ាង បានកសាងរបាំងការពារចំនួន ៤កន្លែង ដែលនីមួយៗមានប្រវែងប្រហែល ២,៥គីឡូម៉ែត្រ នៅភាគខាងជើងនៃខ្សែបន្ទាត់ព្រំដែនយោធាក្នុងតំបន់គ្មានយោធា (DMZ)។

លោកបាននិយាយថា របាំងប្រឆាំងរថក្រោះរបស់កូរ៉េខាងជើងនោះ គឺជារចនាសម្ព័ន្ធនិមិត្តរូប ដែលបង្ហាញពីគោលនយោបាយ "រដ្ឋអរិភាពទាំងពីរ" របស់ខ្លួន ដោយជំរុញឱ្យយោធាកូរ៉េខាងត្បូង បន្ថែមឧបសគ្គថ្មីទៅក្នុងផែនការការពាររបស់ទីក្រុងព្យុងយ៉ាង។

កាលពីខែតុលាឆ្នាំមុន កូរ៉េខាងជើងបានបញ្ជាក់ថា ខ្លួនបានធ្វើវិសោធនកម្មរដ្ឋធម្មនុញ្ញដើម្បីចាត់តាំងកូរ៉េខាងត្បូងជាផ្លូវការ ថាជារដ្ឋ "អរិភាព" ដោយលើកឡើងពីការគំរាមកំហែងផ្នែកសន្តិសុខ និងការកើនឡើងភាពតានតឹងរវាងប្រទេសទាំងពីរ។ នៅឆ្នាំ២០២៣ កូរ៉េខាងជើងក៏បានបោះបង់កិច្ចព្រមព្រៀងអន្តរកូរ៉េឆ្នាំ២០១៨ ដែលបង្កើតតំបន់ទ្រនាប់នៅតាមបណ្តោយព្រំដែនគោក និងសមុទ្រ និងតំបន់ហាមហោះហើរលើ DMZ ផងដែរ៕