អ្នកនាំពាក្យវិមានក្រឹមឡាំងលោក Dmitry Peskov និយាយនៅថ្ងៃពុធនេះថា លោកមិនចង់ធ្វើសេចក្តីអត្ថាធិប្បាយចំពោះអនុសាសន៍របស់លោក Trumpពាក់ព័ន្ធនឹងរុស្ស៊ីនោះទេ ប៉ុន្តែលោក Putin បើកទូលាយចំពោះការស្វែងរកវិធីសាស្រ្តបញ្ចប់សង្រ្គាមអ៊ុយក្រែន ហើយទីក្រុងមូស្គូមានការដឹងគុណលោក Trumpសម្រាប់កិច្ចខិតខំរបស់លោក ។

លោក Peskov និយាយប្រាប់ក្រុមអ្នកសារព័ត៌មានថា សម្រាប់សេដ្ឋកិច្ចរុស្ស៊ី វាមានកម្រិតសុវត្ថិភាពគ្រប់គ្រាន់ និងច្រើនសន្ធឹកសន្ធាប់ ដើម្បីធ្វើឲ្យថ្នាក់ដឹកនាំប្រទេសមួយនេះ និងពួកយើងទាំងអស់គ្នា អនុវត្តផែនការដែលពួកយើងបានកំណត់សម្រាប់ខ្លួនឯង ។

លោកថា ប្រធានាធិបតីសហព័ន្ធរុស្ស៊ី តែងតែដឹកនាំដោយផលប្រយោជន៍ប្រទេសរបស់លោក ដោយអត្ថប្រយោជន៍ពលរដ្ឋរបស់លោក ហើយអ្វីៗដែលលោកធ្វើ លោកធ្វើ ដើម្បីធានាបច្ចុប្បន្នភាព និងអនាគតរបស់ប្រជាពលរដ្ឋពួកយើង ។

គួរឲ្យដឹងថា លោក Trump បាននិយាយកាលពីថ្ងៃអង្គារម្សិលមិញថា លោកប្រធានាធិបតីរុស្ស៊ី Putin គួរតែធ្វើអ្វីមួយចំពោះសង្គ្រាមនៅអ៊ុយក្រែន ដោយហៅថាជាការខាតបង់ដ៏ធ្ងន់ធ្ងរសម្រាប់ទីក្រុងមូស្គូ ។ លោកថា លោកនៅតែខកចិត្ត ដែលសមភាគីរុស្ស៊ី ពុំបានបញ្ចប់សង្រ្គាមជាមួយអ៊ុយក្រែន ។ 

ការលើកឡើងបែបនេះ បានកើតមានប៉ុន្មានថ្ងៃប៉ុណ្ណោះ មុនពេលលោក Trump គ្រោងជួបប្រធានាធិបតីលោក Volodymyr Zelensky នៅថ្ងៃ ១៧ ខែតុលាងខាងមុខ ៕