រុស្ស៊ី នៅថ្ងៃពុធ (ទី១៥ ខែតុលា) នេះ បានប្រាប់ឲ្យដឹងថា ខ្លួនកំពុងតាមដានយ៉ាងដិតដល់នូវព្រឹត្តិការណ៍ នៅក្នុងប្រទេសម៉ាដាហ្គាស្ការ ហើយសង្ឃឹមថា ការបង្ហូរឈាមនឹងត្រូវបញ្ចៀសបាន បន្ទាប់ពីយោធាបានឡើងកាន់អំណាច ក្រោយមានការតវ៉ាជាច្រើនសប្តាហ៍ដែលដឹកនាំដោយយុវជន។

គួរបញ្ជាក់ថា បាតុកម្មបានផ្ទុះឡើងជាលើកដំបូង នៅម៉ាដាហ្គាស្ការ កាលពីថ្ងៃទី២៥ ខែកញ្ញា ជុំវិញបញ្ហាកង្វះទឹក និងថាមពល ហើយបានរីករាលដាលយ៉ាងឆាប់រហ័សទៅជាការតវ៉ាយ៉ាងទូលំទូលាយ ដែលរួមមានទាំងអំពើពុករលួយ អភិបាលកិច្ចមិនល្អ និងកង្វះសេវាមូលដ្ឋាន។

លោកវរសេនីយ៍ឯក Michael Randrianirina បានប្រកាសកាលពីថ្ងៃអង្គារថា លោកបានកាន់អំណាចហើយថា គណៈកម្មាធិការយោធា នឹងគ្រប់គ្រងប្រទេសសម្រាប់រយៈពេលរហូតដល់ ២ឆ្នាំ រួមជាមួយរដ្ឋាភិបាលអន្តរកាលមួយ មុនពេលរៀបចំការបោះឆ្នោតថ្មី។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មាននៅទីក្រុងមូស្គូថា៖ «យើងកំពុងតាមដានការវិវត្តនៃស្ថានការណ៍ នៅម៉ាដាហ្គាស្ការ ដោយក្តីបារម្ភ។ យើងជឿថា អ្វីដែលកំពុងកើតឡើង គឺជាបញ្ហាផ្ទៃក្នុងរបស់ប្រទេសនេះ»។

លោក Zakharova បានបញ្ជាក់ថា «យើងអំពាវនាវឲ្យមានការអត់ធ្មត់ ហើយទប់ស្កាត់ការបង្ហូរឈាម» ដោយលោកស្រីបានបន្ថែមថា ទីក្រុងមូស្គូសង្ឃឹមថា «ការវិលត្រឡប់ទៅកាន់មាគ៌ានៃការអភិវឌ្ឍន៍លទ្ធិប្រជាធិបតេយ្យ» របស់ម៉ាដាហ្គាស្ការ នឹងកើតឡើងយ៉ាងឆាប់តាមដែលអាច។

យោងតាមសារព័ត៌មាន New York Times និង BBC បានឲ្យដឹងថា ក្រុមទាហានស៊ីឈ្នួលរុស្ស៊ី Wagner មានសកម្មភាព នៅប្រទេសម៉ាដាហ្កាស្ការ ក្នុងអំឡុងពេលមានការបោះឆ្នោតប្រធានាធិបតីឆ្នាំ២០១៨៕