ប្រធានាធិបតីប្រទេសប្រេស៊ីល លោក Luiz Inacio Lula da Silva បាននិយាយកាលពីថ្ងៃពុធ ទី១៥ ខែតុលា ថា ប្រេស៊ីលនិងសហរដ្ឋអាមេរិក នឹងបើកការចរចារលើការដំឡើងពន្ធនៅថ្ងៃព្រហស្បតិ៍ ទី១៦ ខែតុលានេះ ។ ការលើកឡើងរបស់ លោក Lula នៅក្នុងព្រឹត្តិការណ៍មួយក្នុងទីក្រុង Rio de Janeiro ធ្វើឡើងបន្ទាប់ពីមានការអំពាវនាវរវាងលោក និងប្រធានាធិបតីអាមេរិក លោក Donald Trump កាលពីសប្តាហ៍មុន ដែលលោក Trump បានចាត់តាំងរដ្ឋមន្ត្រីការបរទេស លោក Marco Rubio ឱ្យបន្តការចរចាការដំឡើងពន្ធជាមួយមន្ត្រីប្រេស៊ីល។

ប្រភពដែលដឹងអំពីបញ្ហាបានប្រាប់សារព័ត៌មាន Reuters ថាលលោក Mauro Vieira និងក្រុមអ្នកបច្ចេកទេសប្រេស៊ីល កំពុងស្ថិតនៅក្នុងទីក្រុងវ៉ាស៊ីនតោន ត្រៀមសម្រាប់កិច្ចប្រជុំនៅថ្ងៃព្រហស្បតិ៍នេះ។ លោក Lula បាននិយាយក្នុងអំឡុងពេលព្រឹត្តិការណ៍សាធារណៈថា «ថ្ងៃព្រហស្បតិ៍នេះ យើងនឹងមានការចរចារ»។ ទីផ្សារប្រេស៊ីល បាននិងកំពុងតាមដានយ៉ាងដិតដល់នូវការវិវឌ្ឍន៍ដ៏មានសក្តានុពលបន្ទាប់ពីការនាំចេញរបស់ប្រេស៊ីល ទទួលរងនូវអត្រាដំឡើងពន្ធខ្ពស់បំផុតដែលបានដាក់ដោយសហរដ្ឋអាមេរិក។

លោក Lula និងលោក Trump មានជម្លោះរយៈពេលជាច្រើនខែមកហើយជុំវិញការជម្រះក្តីនិងកាត់ទោសអតីតប្រធានាធិបតីប្រេស៊ីល លោក Jair Bolsonaro។ លោក Trump បានដំឡើងពន្ធលើទំនិញប្រេស៊ីលជាច្រើនពី ១០% ទៅ៥០% ដោយសារតែករណីនេះ។ ក្នុងអំឡុងពេលនៃការសន្ទនាតាមទូរស័ព្ទកាលពីសប្តាហ៍មុន ប្រធានាធិបតីប្រេស៊ីលបានស្នើសុំឱ្យលោក Trump ដកចេញការដំឡើងពន្ធបន្ថែម៤០% នេះបើយោងតាមសេចក្តីថ្លែងការណ៍ពីការិយាល័យរបស់ លោក Lula ។