នាយករដ្ឋមន្ត្រីអ៊ីស្រាអែល បានប្រាប់អង្គពិធីរំលឹកវិញ្ញាណក្ខន្ធជនរងគ្រោះនៃការវាយប្រហារដឹកនាំដោយក្រុមហាម៉ាស កាលពីថ្ងៃទី ៧ តុលា ឆ្នាំ២០២៣ ថា លោកបានប្តេជ្ញាចិត្ត ក្នុងការធានាឱ្យមានការត្រឡប់មកវិញរាល់ចំណាប់ខ្មាំងដែលបានស្លាប់នៅហ្កាហ្សា ហើយប្រទេសនេះនឹងបន្តប្រយុទ្ធប្រឆាំងនឹងអំពើភេរវកម្មដោយកម្លាំងពេញលេញ។  

លោក Benjamin Netanyahu បានអត្ថាធិប្បាយបែបនេះ ប៉ុន្មានម៉ោងបន្ទាប់ពីក្រុមហាម៉ាស បានប្រគល់សាកសពចំណាប់ខ្មាំងពីរនាក់ទៀត ប៉ុន្តែបាននិយាយថា ខ្លួនមិនអាចចូលទៅដល់ចំណាប់ខ្មាំង ស្លាប់១៦នាក់ដែលនៅសល់បានទេ។គិតត្រឹមថ្ងៃសុក្រសប្ដាហ៍នេះ សាកសពចំណាប់ខ្មាំង១២នាក់ ត្រូវបានប្រគល់ឲ្យអ៊ីស្រាអែលវិញ ខណៈក្រុមហាម៉ាស និយាយថាពួកគេត្រូវគេពេលវេលាដើម្បីស្វែងរកសាកសនៅសេសសល់ពីគំនរកម្ទេចថ្ម។

មានការខឹងសម្បារក្នុងប្រទេសអ៊ីស្រាអែល ដែលក្រុមហាម៉ាស មិនបានប្រគល់សាកសពទាំងអស់មកវិញស្របតាមកិច្ចព្រមព្រៀងបទឈប់បាញ់នៅហ្កាហ្សាកាលពីសប្តាហ៍មុន បើទោះបីជាសហរដ្ឋអាមេរិកបាននិយាយសម្រាលការលើកឡើងថាវាស្មើនឹងការបំពានក៏ដោយ។  

កាលពីថ្ងៃព្រហស្បតិ៍នោះដែរ លោក Donald Trump បានបង្ហាញសញ្ញាថា លោកមានឆន្ទៈចង់ឃើញការប្រយុទ្ធបន្តទៀត ប្រសិនបើក្រុមហាម៉ាសបន្តសម្លាប់មនុស្ស។

លោក Trump ធ្លាប់បានច្រានចោលការដាក់ទាហានអាមេរិកនៅតំបន់ហ្កាហ្សា។

គួរបញ្ជាក់ថា ចំណាប់ខ្មាំងនៅមានជីវិតទាំង ២០ នាក់ត្រូវបានដោះលែងពីដែនដីហ្កាហ្សាកាលពីថ្ងៃចន្ទដើមសប្ដាហ៍នេះ ជាថ្នូរនឹងអ្នកទោសប៉ាឡេស្ទីនចំនួន២៥០ នាក់នៅក្នុងពន្ធនាគារអ៊ីស្រាអែល និងអ្នកជាប់ឃុំ ចំនួន ១.៧១៨ នាក់ ៕