មន្ត្រីអាមេរិកម្នាក់បាននិយាយប្រាប់សារព័ត៌មានរ៉យទ័រថា យោធាសហរដ្ឋអាមេរិក បានបើកការវាយប្រហារថ្មីមួយកាលពីថ្ងៃព្រហស្បតិ៍ (១៦ តុលា) ប្រឆាំងនឹងនាវាសង្ស័យដឹកគ្រឿងញៀនមួយគ្រឿង នៅសមុទ្រការ៉ាអ៊ីប ហើយគេជឿថា នោះជាករណីដំបូងបំផុតដែលមានអ្នករួចជីវិតក្នុងការវាយប្រហារ។

មន្ត្រី ដែលសុំមិនបញ្ចេញឈ្មោះរូបនេះ មិនបានលម្អិតលើឧបទ្ទវហេតុនេះទេ ដោយគ្រាន់តែនិយាយថា គេមិនច្បាស់ឡើយថា ការវាយប្រហារតាមអាកាសនោះត្រូវបានរៀបចំជាមុនដើម្បីទុកឱ្យមានអ្នករួចខ្លួន ឬយ៉ាងណា។ ស្ថានការណ៍នេះបង្កើតជាសំណួរថ្មីៗជាច្រើន រួមទាំងថា តើយោធាអាមេរិកមានបំណងជួយដល់អ្នករួចជីវិតទាំងនោះ ឬក៏ឥឡូវនេះ ពួកគេកំពុងស្ថិតក្នុងការឃុំឃាំងរបស់យោធាអាមេរិក ជាឈ្លើយសឹក។

មន្ទីរបញ្ចកោណ — ដែលហៅអ្នកដែលខ្លួនវាយប្រហារថាជាពួកភេរវករ — មិនបានឆ្លើយតបភ្លាមៗចំពោះសំណើអត្ថាធិប្បាយទេ។ នៅមុនប្រតិបត្តិការថ្ងៃព្រហស្បតិ៍នេះ យោធាអាមេរិកបានវាយប្រហារលើទូកសង្ស័យដឹកគ្រឿងញៀនចេញពីវេណេស៊ុយអេឡា ដោយសម្លាប់មនុស្សយ៉ាងតិច ២៧នាក់ និងបង្កើនក្ដីបារម្ភក្នុងចំណោមអ្នកជំនាញផ្នែកច្បាប់ ជុំវិញការគោរពច្បាប់សង្រ្គាមក្នុងប្រតិបត្តិការនោះ។

រដ្ឋបាលលោកប្រធានាធីបតី Donald Trump បានអះអាងថា អាមេរិកបានចូលរួមក្នុងសង្គ្រាមជាមួយក្រុមភេរវករមកពីវេណេស៊ុយអេឡា រួចទៅហើយ ដោយមានន័យថា ការវាយប្រហារទាំងនេះជារឿងស្របច្បាប់។ មន្ត្រីរដ្ឋបាលលោក Trump ក៏បាននិយាយថា ការវាយប្រហារខ្លាំងក្លាបែបនេះជារឿងចាំបាច់ ពីព្រោះកិច្ចប្រឹងប្រែងពីមុនៗក្នុងការតាមចាប់អ្នកនៅលើនាវា និងរឹបអូសទំនិញ បានបរាជ័យជាប្រវត្តិសាស្ត្រ មិនអាចទប់ស្កាត់លំហូរគ្រឿងញៀនទៅក្នុងទឹកដីអាមេរិកបានឡើយ៕