អ៊ីស្រាអែល បានពន្យារពេលម្តងទៀតនូវការបើកឡើងវិញច្រកឆ្លងកាត់ Rafah តំបន់ហ្កាហ្សាជាមួយប្រទេសអេហ្ស៊ីប ដើម្បីអនុញ្ញាតឱ្យប្រជាជនធ្វើដំណើរ ដោយរដ្ឋមន្ត្រីការបរទេស លោក Gideon Saar បាននិយាយថាច្រកនេះអាចបើកនៅថ្ងៃអាទិត្យ ខណៈការវាយប្រហាររបស់អ៊ីស្រាអែលបានសម្លាប់ពលរដ្ឋប៉ាឡេស្ទីនយ៉ាងហោចណាស់បីនាក់នៅភាគខាងត្បូងតំបន់ហ្កាហ្សា។

នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ អង្គភាពCOGAT ជាអង្គភាពយោធារបស់អ៊ីស្រាអែលទទួលខុសត្រូវលើបញ្ហាជនស៊ីវិលនៅក្នុងដែនដីដែលកាន់កាប់នេះបាននិយាយថាការសម្របសម្រួលកំពុងដំណើរការជាមួយប្រទេសអេហ្ស៊ីបដើម្បីកំណត់កាលបរិច្ឆេទសម្រាប់ការបើកច្រកឆ្លងកាត់ Rafah ឡើងវិញបន្ទាប់ពីបញ្ចប់ការត្រៀមលក្ខណៈដែលចាំបាច់។

អង្គភាពCOGAT បាននិយាយថាច្រកឆ្លងកាត់ Rafah នឹងនៅតែបិទចំពោះការដឹកជញ្ជូនជំនួយដោយអះអាងថាកិច្ចព្រមព្រៀងបទឈប់បាញ់មិនរាប់បញ្ចូលការបើកដំណើរការឡើងវិញទេ។ ការផ្គត់ផ្គង់ផ្នែកមនុស្សធម៌ទាំងអស់ដែលបញ្ជូនទៅតំបន់ហ្កាហ្សា វានឹងជំនួសឱ្យការឆ្លងកាត់ច្រក Karem Abu Salem ឬហៅថា Kerem Shalom នៅអ៊ីស្រាអែល បន្ទាប់ពីការត្រួតពិនិត្យសន្តិសុខរបស់អ៊ីស្រាអែល។

ទីភ្នាក់ងារសារព័ត៌មានអ៊ីតាលី ANSA បានដកស្រង់សម្តីរដ្ឋមន្ត្រីការបរទេសអ៊ីស្រាអែល លោក Gideon Saar ដោយនិយាយថា ច្រក Rafah ប្រហែលជាត្រូវបានបើកឡើងវិញនៅថ្ងៃអាទិត្យខាងមុខនេះ ដោយមិនផ្តល់ព័ត៌មានលម្អិតបន្ថែមនោះទេ។ ច្រកឆ្លងកាត់បានគ្រោងបើកកាលពីថ្ងៃពុធ ក្រោមលក្ខខណ្ឌនៃកិច្ចព្រមព្រៀងបទឈប់បាញ់អ៊ីស្រាអែល និងក្រុមហាម៉ាស ដែលបានចូលជាធរមានកាលពីសប្តាហ៍មុន។