និយតករប្រព័ន្ធផ្សព្វផ្សាយរបស់ចក្រភពអង់គ្លេស Ofcom បានឲ្យដឹងថា ភាពយន្តឯកសាររបស់ប្រព័ន្ធផ្សព្វផ្សាយ BBC អំពីជីវិតរបស់កុមារ នៅតំបន់ហ្កាហ្សា ដែលរៀបរាប់ដោយកូនប្រុសអាយុ ១៣ឆ្នាំរបស់អនុរដ្ឋមន្ត្រីកសិកម្ម នៅក្នុងរដ្ឋាភិបាលគ្រប់គ្រងដោយក្រុមហាម៉ាស បានបំពានច្បាប់ការផ្សាយ។

ស្ថាប័ននេះបានលើកឡើងថា ការដែលមិនបង្ហាញមុខតំណែងរបស់ឪពុកក្មេងប្រុសនេះ គឺជា «ការបង្កឲ្យមានការភ័ន្តច្រឡំយ៉ាងខ្លាំង»។ ប្រព័ន្ធផ្សព្វផ្សាយ BBC បានលុបចោលភាពយន្តឯកសារដែលមានចំណងជើងថា Gaza: How To Survive A War Zone (តំបន់ហ្កាហ្សា៖ តើត្រូវរស់យ៉ាងដូចម្ដេច ក្នុងតំបន់មានសង្គ្រាម) ចេញពីវេទិកាអនឡាញរបស់ខ្លួន កាលពីខែកុម្ភៈ ពោលគឺមានរយៈពេល ៥ថ្ងៃបន្ទាប់ពីវាត្រូវបានចាក់ផ្សាយ។

ការស៊ើបអង្កេតពីប្រព័ន្ធផ្សព្វផ្សាយនេះផ្ទាល់ បានរកឃើញនៅក្នុងខែកក្កដាថា កម្មវិធីនេះបានបំពានគោលការណ៍ណែនាំវិចារណកថារបស់ខ្លួន ស្ដីពីភាពត្រឹមត្រូវ។ តែយ៉ាងណាក្ដី សា្ថប័នសារព័ត៌ាមនដ៏ធំនេះបានបញ្ជាក់ថា មិនមានភស្តុតាង ដែលបង្ហាញថា ផលប្រយោជន៍ខាងក្រៅ មាន «ផលប៉ះពាល់មិនសមរម្យលើកម្មវិធី» នេះនោះទេ។

សា្ថប័ន Ofcom ដែលបានទទួលពាក្យបណ្តឹងចំនួន ២០ អំពីភាពយន្តឯកសារនេះ បានឲ្យដឹងថា ខ្លួនបានណែនាំឲ្យប្រព័ន្ធផ្សព្វផ្សាយ BBC ផ្សាយសេចក្តីថ្លែងការណ៍ ស្តីពីការរកឃើញរបស់ខ្លួន នៅថ្ងៃដែលត្រូវបញ្ជាក់៕