ភ្នំពេញ ៖ សមាគមចំនួន៣ ចុះអនុស្សាណៈលើការរួមគ្នាចែករំលែកជំនាញ ចំណេះដឹង តាមរយៈការបណ្តុះបណ្តាល ដំណើរទស្សនកិច្ច សិក្សា ដើម្បីជំរុញលើកស្ទួយអាជីវកម្មខ្នាតតូច និងមធ្យមនៅកម្ពុជា មានឱកាសពង្រីកទីផ្សារ ដើម្បីជំរុញការធ្វើអាជីវកម្មប្រកបដោយ និរន្តរភាព។

​ឯកឧត្តមបណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងក្នុងជំនួបសហគ្រិន និងផ្គូរផ្គងអាជីវកម្មកម្ពុជា-ចិន សម្រាប់សហគ្រាសធុនតូច និងមធ្យម នៅថ្ងៃទី១៧ ខែតុលា ឆ្នាំ២០២៥ នេះថា ជុំវិញការធ្វើពាណិជ្ជកម្ម និងវិនិយោគ, សមាគមបាន យកចិត្តទុកដាក់យ៉ាងខ្លាំងដល់ធុរកិច្ចដែលជាសមាជិក ទាំងអាជីវកម្មខ្នាតតូចនិងមធ្យម តាមរយៈការបណ្តុះបណ្តាលជំនាញ ការស្វែង រកទីផ្សារ និងការចាប់ដៃគូរអាជីវកម្ម ដើម្បីជំរុញដល់ដំណើរការអាជីវកម្មរបស់ពួកគាត់ ក្នុងនោះប្រសិនអាជីវកម្មដំណើរការប្រកប ដោយជោគជ័យ គឺមិនត្រឹមជួយបង្កើតប្រាក់ចំណូលដល់ពួកគាត់ប៉ុណ្ណោះទេ ថែមទាំងបង្កើតការងារជូនប្រជាពលរដ្ឋ និងការចូមរួម ចំណែកក្នុងសេដ្ឋកិច្ចជាតិផងដែរ។

ឯកឧត្តមបណ្ឌិត បន្តថា ជុំវិញបញ្ហានេះ សមាគមបានបង្កើតនូវកិច្ចសហប្រតិបត្តិការជាមួយដៃគូពាក់ព័ន្ធជាច្រើន ទាំងជាតិ និងអន្តរជាតិ ជាក់ស្តែងក្នុងពេលនេះសមាគមបានរៀបចំជំនួបសហគ្រិន និងផ្គូរផ្គងអាជីវកម្មកម្ពុជា-ចិន គឺជាការបង្កើតឱកាសថ្មី បន្ថែមទៀត សម្រាប់ធុរកិច្ចនៃប្រទេសទាំងពីរ ក្នុងការចែករំលែកនូវបទពិសោធន៍ និងចំណេះដឹងផ្សេងៗ ក៏ដូចជាបង្ហាញនូវគន្លឹះជោគ ជ័យលើការអាជីវកម្ម និងពាណិជ្ជកម្ម ជាពិសេសការស្វែងដៃគូពាណិជ្ជកម្ម និងឱកាសវិនិយោគបន្ថែម នៅក្នុងប្រភេទអាជីវកម្មខ្នាតតូច និងមធ្យម ដើម្បីជំរុញឱ្យវិស័យនេះរីកលូតលាស់ប្រកបដោយនិរន្តរភាព។ 

 បណ្ឌិត អ៊ី សុវណ្ណារ៉ា ប្រធានសមាគមសហគមន៍អភិវឌ្ឍន៍កម្ពុជា-ចិន ក៏លើកឡើងពីសក្តានុពលប្រទេសកម្ពុជា ដោយបាន បង្កើតទំនុកចិត្តដល់វិនិយោគិនបរទេស ជាពិសេសវិនិយោគិនមកពីប្រទេសចិន មកបណ្តាក់ទុននៅកម្ពុជាជាបន្តបន្ទាប់ ចំណែកតាម រយៈនៃកិច្ចសហប្រតិបត្តិការនេះ មានគោលបំណងបង្កើតនូវក្របខណ្ឌរវាងគូភាគី សម្រាប់ជាដៃគូយុទ្ធសាស្រ្តយូរអង្វែង ជំរុញលើក ស្ទួយអាជីវកម្មខ្នាតតូច និងមធ្យមនៅកម្ពុជា ដែលតាមរយៈនេះគឺជាការចូលរួមចំណែកបន្ថែម ពង្រឹងដល់ការធ្វើធុរកិច្ច ក្រោមបរិយា កាសនៃការធ្វើពាណិជ្ជកម្ម និងការវិនិយោគ។

សូមបញ្ជាក់ថា ក្នុងជំនួបសហគ្រិន និងផ្គូផ្គងអាជីវកម្មនេះ សមាគមសហគ្រិនវីម៉ូកម្ពុជា បានចុះអនុស្សាណៈយោគយល់គ្នា ជាមួយ សមាគមសហគមន៍អភិវឌ្ឍន៍កម្ពុជា-ចិន និងសាខាសមាគមនិស្សិតបញ្ញាវន្តក្មេងវត្ត (ខណ្ឌព្រែកព្នៅ) ស្តីពីកិច្ចសហប្រតិបត្តិការជាដៃ គូរួមគ្នាជំរុញលើកស្ទួយអាជីវកម្មខ្នាតតូច និងមធ្យមនៅកម្ពុជា តាមរយៈការបង្កើតដល់ម្ចាស់អាជីវកម្ម ជួយដល់សមាជិក-សមាជិកា ពង្រីកទីផ្សារ និងបង្កើតទំនាក់ទំនងអាជីវកម្មប្រកបដោយសក្តានុពល ជាពិសេសការរួមគ្នាចែករំលែកជំនាញ ចំណេះដឹង តាមរយៈវគ្គ បណ្តុះបណ្តាល ដំណើរទស្សនកិច្ចសិក្សា ដើម្បីរួមបញ្ចូលកំលាំងគ្នាជួយសម្រួលដល់សហគ្រាសធុនតូច និងមធ្យម អាចឈានជើង ចូលទីផ្សារប្រកួតប្រជែងកាន់តែខ្លាំងក្លាថែមទៀត៕

អត្ថបទ៖ សុន រ៉ាឌី