ក្រុមមន្រ្តីនិយាយថា ជើងហោះហើរចេញ-ចូលអាកាសយានដ្ឋានធំរបស់ប្រទេសបង់ក្លាដែស ត្រូវបានពន្យាពេល ឬបង្វែរទិសដៅហោះហើរ កាលពីថ្ងៃសៅរ៍ ក្រោយកើតមានអគ្គិភ័យនៅចំណតទំនិញ ។

គេហទំព័រតាមដានជើងហោះហើរ FlightRadar24 បង្ហាញយន្តហោះត្រូវបានបង្វែរទិសដៅហោះហើរចេញពីអាកាសយានដ្ឋាន ។

ពុំមានព័ត៌មានភ្លាមៗនោះទេពីមូលហេតុដែលបណ្តាលឲ្យកើតមានអគ្គិភ័យនេះឡើង ស្របពេលដែលជើងហោះហើរក្នុងស្រុក និងអន្តរជាតិ រងផលប៉ះពាល់ ។

លោក Talha Bin Zasim គឺជាមន្រ្តីមួយរូបរបស់សេវាកម្មពន្លត់អគ្គិភ័យបង់ក្លាដែសនិយាយប្រាប់ទីភ្នាក់ងារព័ត៌មានរ៉យទ័រថា អង្គភាពពន្លត់អគ្គិភ័យចំនួន ៣៦អង្គភាព បានធ្វើការដើម្បីពន្លត់អគ្គិភ័យ ។

ចំណែកឯលោក Masudul Hasan គឺជាមន្រ្តីអាកាសយានដ្ឋាននិយាយប្រាប់ក្រុមអ្នកសារព័ត៌មានថា ប្រតិបត្តិការនៅអាកាសយានដ្ឋានអន្តរជាតិ Hazrat Shahjalal ស្ថិតក្នុងទីក្រុង Dhaka ត្រូវបានផ្អាក ។

កងទ័ពជើងគោក កងទ័ពជើងទឹក និងកងទ័ពអាកាស បានចូលរួមជាមួយសេវាកម្មពន្លត់អគ្គិភ័យ ដើម្បីព្យាយាមគ្រប់គ្រងអគ្គិភ័យ ៕