អាហ្វហ្គានីស្ថាន និងប៉ាគីស្ថាន បានព្រមព្រៀងគ្នាលើបទឈប់បាញ់ភ្លាមៗក្នុងអំឡុងកិច្ចចរចានៅទីក្រុងដូហា នេះបើតាមការលើកឡើងរបស់ភាគីទាំងពីរនៅថ្ងៃអាទិត្យ (១៩ តុលា) នេះ បន្ទាប់ពីការប៉ះទង្គិចនៅព្រំដែនដ៏កម្រោលអស់មួយសប្តាហ៍ ដែលជាអំពើហិង្សាដ៏អាក្រក់បំផុតរវាងប្រទេសជិតខាងអាស៊ីខាងត្បូងទាំងពីរ ចាប់តាំងពីពួកតាលីបង់ដណ្តើមអំណាចនៅទីក្រុងកាប៊ុល ក្នុងឆ្នាំ២០២១មក។

រដ្ឋមន្ត្រីការពារជាតិប៉ាគីស្ថាន លោក Khawaja Muhammad Asif បានបង្ហោះលើបណ្ដាញសង្គម X នៅថ្ងៃអាទិត្យនេះថា បទឈប់បាញ់ "ត្រូវបានសម្រេចហើយ" ដោយបន្តថា ភាគីទាំងពីរនឹងជួបគ្នាម្តងទៀតនៅថ្ងៃទី២៥ ខែតុលា ខាងមុខនៅទីក្រុងអ៊ីស្តង់ប៊ុល ដើម្បីពិភាក្សាពី "បញ្ហាលម្អិត"។ អ្នកនាំពាក្យក្រុមតាលីបង់ លោក Zabihullah Mujahid ក៏បាននិយាយក្នុងសេចក្តីថ្លែងការណ៍មួយថា ភាគីទាំងពីរបានយល់ព្រមលើបទឈប់បាញ់ពេញលេញ និងប្រកបដោយអត្ថន័យ។

ក្រសួងការបរទេសកាតា ដែលសម្របសម្រួលកិច្ចពិភាក្សាកាលពីថ្ងៃសៅរ៍នោះរួមជាមួយនឹងទួរគី បាននិយាយថា កិច្ចប្រជុំបន្តគឺមានន័យថា "ដើម្បីធានានិរន្តរភាពនៃបទឈប់បាញ់ និងផ្ទៀងផ្ទាត់ការអនុវត្តរបស់កិច្ចព្រមព្រៀងនេះ ក្នុងលក្ខណៈដែលអាចទុកចិត្តបាន និងនិរន្តរភាព"។

ប៉ាគីស្ថាន និងអាហ្វហ្គានីស្ថាន កំពុងស្វែងរកផ្លូវឆ្ពោះទៅមុខ បន្ទាប់ពីការប៉ះទង្គិចបានសម្លាប់មនុស្សរាប់សិបនាក់ និងរាប់រយនាក់រងរបួស។ គួរឱ្យដឹងថា ភាពតានតឹងថ្មីៗនេះរវាងអតីតសម្ព័ន្ធមិត្តទាំងពីរ បានផ្ទុះឡើងបន្ទាប់ពីប៉ាគីស្ថាន ទាមទារឱ្យរដ្ឋបាលតាលីបង់អាហ្វហ្គានីស្ថាន ចាត់វិធានការទប់ទល់ពួកសកម្មប្រយុទ្ធដែលបង្កើនការវាយប្រហារនៅប៉ាគីស្ថាន ដោយនិយាយថា ក្រុមទាំងនោះប្រតិបត្តិការពីជម្រកក្នុងទឹកដីអាហ្វហ្គានីស្ថាន។ ប៉ុន្តែក្រុមតាលីបង់បានច្រានចោល ហើយចោទយោធាប៉ាគីស្ថានវិញថាផ្សាយព័ត៌មានមិនពិតពីអាហ្វហ្គានីស្ថាន ដែលបង្កឱ្យមានភាពតានតឹងនៅតាមព្រំដែន៕