ការរំពឹងទុកពីមជ្ឈដ្ឋានទូទៅបានកើនឡើងកាន់តែខ្លាំងនៅថ្ងៃចន្ទ (២០ តុលា) នេះថា អ្នកអភិរក្សនិយម លោកស្រី Sanae Takaichi នឹងក្លាយជានាយករដ្ឋមន្ត្រីស្ត្រីដំបូងគេបង្អស់របស់ប្រទេសជប៉ុន បន្ទាប់ពីមានការគាំទ្រពីគណបក្សប្រឆាំងស្តាំនិយម គឺគណបក្សនវានុវត្តន៍ជប៉ុន ដែលគេស្គាល់ថាក្រុម Ishin ជុំវិញការបង្កើតក្រុមចម្រុះ ខណៈក្ដីសង្ឃឹមនេះបានជំរុញភាគហ៊ុននៅទីក្រុងតូក្យូ ឱ្យកើនឡើងខ្ពស់បំផុត។

សមាជិកសភាខាងក្រុម Ishin នឹងជួបប្រជុំគ្នានៅម៉ោងក្នុងស្រុក ២រសៀល ដើម្បីពិភាក្សាពីការបង្កើតរដ្ឋាភិបាលចម្រុះ ជាមួយបក្សប្រជាធិបតេយ្យសេរីនិយម (LDP) ដែលកំពុងកាន់អំណាច បន្ទាប់មកនឹងមានកិច្ចពិភាក្សារវាងប្រធានបក្ស LDP គឺលោកស្រី Takaichi និងប្រធានក្រុម Ishin លោក Fumitake Fujita និងអភិបាលខេត្តអូសាកា លោក Hirofumi Yoshimura ជាទីដែលក្រុមចម្រុះផ្លូវការត្រូវរំពឹងថានឹងសម្រេចចុងក្រោយ។

ប្រព័ន្ធផ្សព្វផ្សាយជប៉ុនបានរាយការណ៍ថា បក្សទាំងពីរយល់ព្រមបង្កើតក្រុមចម្រុះមួយរួចហើយ ប៉ុន្តែការប្រកាសជាផ្លូវការនឹងធ្វើឡើងក្រោយកិច្ចប្រជុំថ្ងៃចន្ទនេះ។

កិច្ចសហប្រតិបត្តិការមួយរវាងបក្ស LDP និងក្រុម Ishin នឹងផ្តល់អាសនៈរួមគ្នាចំនួន ២៣១កៅអី នៅក្នុងសភាជាន់ទាបរបស់ជប៉ុន ជាវេទិកាសម្រេចអ្នកឈ្នះតំណែងនាយករដ្ឋមន្ត្រី។ នោះមានន័យថា លោកស្រី Takaichi នឹងខ្វះតែការគាំទ្រ ២សំឡេងទៀតប៉ុណ្ណោះដែលត្រូវការ ប៉ុន្តែចំណុចនេះក៏ប្រាកដថា លោកស្រីអាចជាអ្នកឈ្នះឆ្នោតក្នុងសភានៅថ្ងៃអង្គារស្អែកនេះ ដើម្បីក្លាយជានាយករដ្ឋមន្ត្រីបន្ទាប់ និងជាមេដឹកនាំស្រ្តីដំបូងគេរបស់ជប៉ុន៕