ទីភ្នាក់ងារសារព័ត៌មានរដ្ឋរបស់បេឡារុស កាលពីថ្ងៃអាទិត្យ (ទី១៩ ខែតុលា) បានរាយការណ៍ថា ប្រធានទីភ្នាក់ងារសន្តិសុខរបស់ប្រទេសបេឡារុស បាននិយាយថា ស្ថាប័នរបស់លោក កំពុងព្យាយាមបង្កើតទំនាក់ទំនងជាមួយអ៊ុយក្រែន ដើម្បីជួយសម្រេចបាននូវដំណោះស្រាយនៃសង្គ្រាមដែលមានរយៈពេលជាង ៣ឆ្នាំកន្លះ ជាមួយប្រទេសរុស្ស៊ី។

ការអត្ថាធិប្បាយរបស់លោក Ivan Tertel ទៅកាន់ទូរទស្សន៍រដ្ឋ បានកើតឡើងបន្ទាប់ពីមានរបាយការណ៍ កាលពីសប្តាហ៍មុនថា អ្នកការទូតជាន់ខ្ពស់បេឡារុស បានជួបប្រជុំជាមួយអឺរ៉ុប ដើម្បីព្យាយាមសម្រាលភាពឯកោដែលបានដាក់យ៉ាងយូរលើប្រទេសរបស់លោក ដោយសារតែបន្តមានសម្ព័ន្ធមិត្តជិតស្និទ្ធជាមួយប្រធានាធិបតីរុស្ស៊ី លោក Vladimir Putin។

លោក Tertel ដែលការកត់សម្គាល់របស់លោក ត្រូវបានរាយការណ៍ដោយទីភ្នាក់ងារព័ត៌មាន Belta បាននិយាយថា កិច្ចប្រជុំជាមួយមន្ត្រីអ៊ុយក្រែន មានសារៈសំខាន់ «សម្រាប់ស្ថានភាពបច្ចុប្បន្ន ដើម្បីអាចឈានដល់ការឯកភាពគ្នា»។

លោក Tertel ដែលទីភ្នាក់ងាររបស់លោក នៅតែប្រើអក្សរកាត់សម័យសូវៀត KGB បានបញ្ជាក់ថា៖ «ការងារនេះក៏កំពុងដំណើរការផងដែរ។ ពិតណាស់ បញ្ហាភាគច្រើន អាស្រ័យលើភាគីអ៊ុយក្រែន។ លោកប្រធានាធិបតីរបស់យើង កំពុងធ្វើការយ៉ាងច្រើនតាមដែលលោកអាច ដើម្បឲ្យស្ថានភាពក្នុងតំបន់មានស្ថិរភាព»។

លោកប្រធានរូបនេះបានសង្កត់ធ្ងន់ថា៖ «ហើយយើងបានរកឃើញតុល្យភាពនៃផលប្រយោជន៍របស់ភាគីទាំង២ នៅក្នុងស្ថានភាពដ៏ស្មុគស្មាញនេះ ដោយមានទំនោរឆ្ពោះទៅរកភាពតានតឹង។ ខ្ញុំជឿជាក់ថា យើងអាចលុបបំបាត់ស្ថានការណ៍នេះបាន តាមរយៈតែការចរចាយ៉ាងស្ថប់ស្ងាត់ និងការស្វែងរកការសម្របសម្រួលប៉ុណ្ណោះ»។

គួរបញ្ជាក់ថា ប្រធានាធិបតីបេឡារុស លោក Alexander Lukashenko បានអនុញ្ញាតឲ្យវិមានក្រឹមឡាំងប្រើប្រាស់ដែនដីនៃប្រទេសរបស់លោក ដើម្បីចាប់ផ្តើមផ្នែកមួយនៃសង្រ្គាមឆ្នាំ២០២២ ជាមួយអ៊ុយក្រែន ប៉ុន្តែបានបន្តធ្វើឲ្យកងកម្លាំងប្រដាប់អាវុធរបស់លោកនៅក្រៅជម្លោះនេះ៕