ក្រុមមេដឹកនាំធុរកិច្ចនៅបង់ក្លាដែសព្រួយបារម្ភខ្លាចខាតបង់ប្រាក់ជាង ១ពាន់លានដុល្លារ ក្រោយអគ្គិភ័យឆាបឆេះចំណតភស្តុភារនៃអាកាសយានដ្ឋានធំរបស់ប្រទេសមួយនេះ កាលពីថ្ងៃសៅរ៍ ។

ពុំទាន់មានព័ត៌មានភ្លាមៗនោះទេពីមូលហេតុដែលបណ្តាលឲ្យកើតមានអគ្គិភ័យនេះឡើង ស្របពេលដែលជើងហោះហើរក្នុងស្រុក និងអន្តរជាតិ រងផលប៉ះពាល់ ។

លោក Talha Bin Zasim គឺជាមន្រ្តីមួយរូបរបស់សេវាកម្មពន្លត់អគ្គិភ័យបង់ក្លាដែសនិយាយប្រាប់ទីភ្នាក់ងារព័ត៌មានរ៉យទ័រថា អង្គភាពពន្លត់អគ្គិភ័យចំនួន ៣៦អង្គភាព បានប្រើពេល ២៧ម៉ោងទើបអាចពន្លត់អគ្គិភ័យនេះបាន ។

យោងតាមការអះអាងរបស់សមាគមនាំចេញបង់ក្លាដែសបានឲ្យដឹងថា សម្លៀកបំពាក់ និងវត្ថុធាតុដើម ស្ថិតនៅក្នុងចំណោមទំនិញដែលត្រូវបានបំផ្លាញ ។

បង់ក្លាដែសគឺជាប្រទេសនាំចេញសម្លៀកបំពាក់ធំបំផុតទី ២របស់ពិភពលោក បន្ទាប់ពីចិន ដោយពួកគេផ្គត់ផ្គង់ក្រុមហ៊ុនលក់រាយសកលដូចជាក្រុមហ៊ុន H&M និងក្រុមហ៊ុន Walmart ៕