កាលពីថ្ងៃអាទិត្យម្សិលមិញ នាយករដ្ឋមន្រ្តីអ៊ីស្រាអែលលោក Benjamin Netanyahu បានកោះប្រជុំគណៈរដ្ឋមន្រ្តី ដើម្បីបោះឆ្នោតដាក់ឈ្មោះជាផ្លូវការសង្រ្គាមហ្កាហ្សាថាជា “សង្រ្គោះរំដោះបាប” ។

សង្រ្គាមដែលបានចាប់ផ្តើម ក្រោយការវាយប្រហារដ៏គួរភ្ញាក់ផ្អើលដឹកនាំដោយក្រុមហាម៉ាស លើតំបន់សហគមន៍អ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ ត្រូវបានដាក់ឈ្មោះថាជា “ដាវដែក” ដោយកងទ័ពអ៊ីស្រាអែលកាលពីថ្ងៃទី ៨ ខែតុលា ឆ្នាំ ២០២៣ ។

ភ្លាមៗក្រោយរូបភាពវីដេអូឃ្លីបឃើញលោក Netanyahu ធ្វើដំណើរទៅចូលរួមកិច្ចប្រជុំគណៈរដ្ឋមន្រ្តី និងការពន្យល់ពីហេតុផលរបស់លោកនៅពីក្រោយការដាក់ឈ្មោះ ត្រូវបានចុះផ្សាយរួចមកនោះ ការផ្ទុះអាវុធដាក់គ្នា បានចាត់ផ្តើមឡើងនៅតំបន់ភាគខាងត្បូងតំបន់ហ្កាហ្សាស្រ្ទីប បើទោះបីជាមានកិច្ចព្រមព្រៀងបទឈប់បាញ់រៀបចំឡើងដោយសហរដ្ឋអាមេរិកក៏ដោយ ។

សារព័ត៌មានអ៊ីស្រាអែល រាយការណ៍ថា យោធាអ៊ីស្រាអែល បានបើកការវាយប្រហារលើតំបន់ហ្កាហ្សា ក្រោយក្រុមជីវពលហាម៉ាស វាយប្រហារលើកងកម្លាំងអ៊ីស្រាអែល ជាហេតុធ្វើឲ្យកាន់តែលែងមានក្តីសង្ឃឹមថា បទឈប់បាញ់រយៈពេល ១សប្តាហ៍កន្លងមកនេះ នឹងនាំទៅរកសន្តិភាពយូរអង្វែងនៅដែនដីប៉ាឡេស្ទីន ស្របពេលដែលអ៊ីស្រាអែលដាក់ការស្តីបន្ទោសលើក្រុមហាម៉ាស ។

រដ្ឋាភិបាលអ៊ីស្រាអែល និងក្រុមហាម៉ាស បានចោទប្រកាន់គ្នាទៅវិញទៅមកថា បានបំពានបទឈប់បាញ់អស់រយៈពេលជាច្រើនថ្ងៃមកហើយ ៕