សភាជប៉ុន គ្រោងបោះឆ្នោតជ្រើសរើសលោកស្រី Sanae Takaichi ឱ្យក្លាយជានាយករដ្ឋមន្ត្រីស្ត្រីដំបូងគេរបស់ជប៉ុន នៅថ្ងៃអង្គារ (២១ តុលា) នេះ បន្ទាប់ពីគណបក្សប្រជាធិបតេយ្យសេរីនិយម (LDP) របស់លោកស្រី បានធ្វើកិច្ចព្រមព្រៀងបង្កើតរដ្ឋាភិបាលចម្រុះជាមួយដៃគូថ្មី គឺបក្សនវានុវត្តន៍ជប៉ុន (JIP) ឬហៅថាក្រុម Ishin ដែលនឹងទាញប្លុកកាន់អំណាចឱ្យងាកទៅខាងស្តាំនិយមបន្ថែមទៀត។

សភាតំណាងរាស្រ្តជប៉ុននិយាយថា សភានឹងបើកសម័យប្រជុំចាប់ពីម៉ោងក្នុងស្រុក ១រសៀល នៅសភាជាន់ទាប ហើយការបោះឆ្នោតជ្រើតាំងនាយករដ្ឋមន្រ្តីថ្មី ត្រូវរំពឹងថានឹងចាប់ផ្តើមភ្លាមៗក្រោយបើកសម័យប្រជុំរួច។

លោកស្រី Takaichi នឹងជំនួសតំណែងលោកនាយករដ្ឋមន្ត្រី Shigeru Ishiba ដោយបញ្ចប់ភាពទំនេរនយោបាយអស់រយៈពេលបីខែ និងការខ្វែងគំនិតនានា ចាប់តាំងពីខែកក្កដាមក។ លោក Ishiba ដែលកាន់តំណែងបានតែ ១ឆ្នាំប៉ុណ្ណោះ បានលាលែងពីតំណែងជាផ្លូវការ រួមជាមួយគណៈរដ្ឋមន្ត្រីរបស់លោក នៅថ្ងៃអង្គារដដែលនេះ ដោយបើកផ្លូវសម្រាប់អ្នកស្នងតំណែងបន្ត។

ថ្លែងក្នុងពិធីចុះហត្ថលេខាបង្កើតក្រុមចម្រុះកាលពីថ្ងៃចន្ទ ជាមួយមេដឹកនាំបក្ស JIP លោកស្រី Takaichi បាននិយាយថា "ស្ថិរភាពនយោបាយគឺជាភាពចាំបាច់ណាស់នៅពេលនេះ... បើគ្មានស្ថិរភាពទេ ជប៉ុនមិនអាចជំរុញវិធានការសម្រាប់សេដ្ឋកិច្ចរឹងមាំ ឬការទូតបានឡើយ"។

នៅពេលជាប់ឆ្នោតជានាយករដ្ឋមន្ត្រីហើយ លោកស្រី Takaichi វ័យ ៦៤ឆ្នាំ នឹងបើកបង្ហាញគណៈរដ្ឋមន្ត្រីរបស់ខ្លួនជាមួយនឹងក្រុមសម្ព័ន្ធមិត្តរបស់អ្នកនយោបាយដ៏មានឥទ្ធិពលក្នុងបក្ស LDP នោះគឺលោក Taro Aso និងអ្នកផ្សេងទៀតដែលគាំទ្រលោកស្រី ក្នុងការបោះឆ្នោតជាប្រធានបក្ស។ លោកស្រី Takaichi នឹងក្លាយជាស្ត្រីដំបូងដែលកាន់តំណែងជានាយករដ្ឋមន្ត្រីជប៉ុន៕