ក្រុមនិស្សិតឥណ្ឌូនេស៊ីបានចេញតវ៉ានៅទីក្រុងហ្សាកាតា កាលពីថ្ងៃទី ២០ ខែតុលាដើមសប្ដាហ៍នេះ ខណៈលោកប្រធានាធិបតី Prabowo Subianto បានដឹកនាំអាណត្តិមួយឆ្នាំពេញ ពីរខែបន្ទាប់ពីបាតុកម្មហិង្សាទូទាំងប្រទេស ។ 

និស្សិតប្រហែល ៣០០ នាក់ពាក់អាវពណ៌លឿង និងពណ៌ខៀវ បានប្រមូលផ្តុំគ្នានៅជិតវិមានប្រធានាធិបតី ខណៈគណៈរដ្ឋមន្ត្រីរបស់លោក Prabowo បានជួបប្រជុំ ដែលចំនួននេះតិចជាងចំនួននៃអ្នកចូលរួមតវ៉ាដឹកនាំដោយនិស្សិតកាលពីខែសីហា ប្រឆាំងនឹងគោលនយោបាយរដ្ឋាភិបាល និងអត្ថប្រយោជន៍សមាជិកសភា ដែលរីករាលដាលទូទាំងប្រទេស។

ដោយកាន់បដាសរសេរថា កម្មវិធីផ្ដល់ជូនអាហារឥតគិតថ្លៃស្មើនឹងថ្នាំពុល ក្រុមនិស្សិតទាមទារឱ្យបញ្ចប់យុទ្ធនាការផ្ដល់អាហារតាមសាលារៀនដ៏ល្បីល្បាញរបស់លោក Prabowo សម្រាប់សិស្សរាប់លាននាក់ និងស្ត្រីមានផ្ទៃពោះ ដែលបានធ្វើឱ្យសិស្សរាប់ពាន់នាក់ពុលអាហារ។

និស្សិតជាអ្នកចូលរួមតវ៉ា វ័យ២៥ឆ្នាំម្នាក់ ឈ្មោះ Maulana Sai មកពីសាកលវិទ្យាល័យ Jayabaya ដែលបានអំពាវនាវឱ្យមានកំណែទម្រង់គោលនយោបាយរដ្ឋាភិបាល រួមទាំងកម្មវិធីអាហារ បាននិយាយថា នៅតែមានបញ្ហាដែលមិនត្រូវបានដោះស្រាយ ទោះបីជាដំណើរការបានចាប់ផ្តើមក៏ដោយ។

សម្ព័ន្ធចម្រុះនៃក្រុមនិស្សិតដ៏ល្បីល្បាញត្រូវគេហៅថា BEM SI បានចេញផ្សាយផ្ទាំង poster មួយនៃការតវ៉ាកាលពីថ្ងៃចន្ទ លើបណ្ដាញសង្គម Instagram អមដោយឃ្លាថា មួយឆ្នាំគ្រប់គ្រាន់ហើយ និងឃ្លាមួយទៀតថា បញ្ហាដែលនៅតែបន្តពេញមួយឆ្នាំ៕