ប្រធានាធិបតីសហរដ្ឋអាមេរិក លោក Donald Trump និងនាយករដ្ឋមន្ត្រីអូស្ត្រាលី លោក Anthony Albanese កាលពីថ្ងៃចន្ទ ទី២០ ខែតុលា បានចុះហត្ថលេខាលើកិច្ចព្រមព្រៀងថ្មីមួយដើម្បីជំរុញកិច្ចសហប្រតិបត្តិការលើរ៉ែកម្រនិងរ៉ែសំខាន់ៗ ជាផ្នែកនៃកិច្ចខិតខំប្រឹងប្រែងដើម្បីកាត់បន្ថយការពឹងផ្អែកលើប្រទេសចិនសម្រាប់សម្ភារៈឧស្សាហកម្មសំខាន់ៗ។ 

លោក Trump និយាយថា «សហរដ្ឋអាមេរិក និងអូស្ត្រាលី កំពុងពង្រឹងសន្តិសុខថាមពល និងបច្ចេកវិទ្យារួមគ្នា»។ សេតវិមានបាននិយាយនៅក្នុងរបាយការណ៍ថា នៅក្រោមកិច្ចព្រមព្រៀងនេះ ប្រទេសទាំងពីរនឹងវិនិយោគជាង៣ពាន់លានដុល្លារលើគម្រោងរ៉ែសំខាន់ៗក្នុងរយៈពេល៦ខែខាងមុខ ខណៈមន្ទីរបញ្ចកោណក៏នឹងវិនិយោគរោងចក្រចម្រាញ់សារធាតុកាលីយ៉ូម(Gallium) នៅក្នុងប្រទេសអូស្ត្រាលីផងដែរ។ អូស្ត្រាលី ក៏នឹងជំរុញការវិនិយោគសរុបរបស់ខ្លួននៅក្នុងសហរដ្ឋអាមេរិកជិត១ពាន់ពាន់លានដុល្លារ ដែលសរុបមានចំនួន១,៤៤ពាន់ពាន់លានដុល្លារនៅឆ្នាំ២០៣៥។ កិច្ចព្រមព្រៀងនេះធ្វើឡើងខណៈប្រទេសចិនរឹតបន្តឹងការគ្រប់គ្រងលើការផ្គត់ផ្គង់រ៉ែកម្រជាសាកល។ សម្ភារៈទាំងនេះមានសារៈសំខាន់សម្រាប់រថយន្តអគ្គិសនី ម៉ាស៊ីនយន្តហោះ និងប្រព័ន្ធសព្វាវុធទំនើបៗ។ នៅពេលដែលប្រទេសចិនមានទុនបំរុងច្រើនបំផុតលើពិភពលោក អូស្ត្រាលីក៏ជាប្រទេសផលិតដ៏ធំមួយផងដែរ ហើយកំពុងស្វែងរកការពង្រីកសមត្ថភាពចម្រាញ់។ 

មេដឹកនាំទាំងពីរក៏បានពិភាក្សាគ្នាអំពីកិច្ចព្រមព្រៀងនាវាមុជទឹកកិច្ចព្រមព្រៀងសន្តិសុខអាគូស(AUKUS) ជាកតិកាសញ្ញាការពារជាតិដែលបានព្រមព្រៀងគ្នាលើកដំបូងកាលពីឆ្នាំ២០២៣ ក្រោមការដឹកនាំរបស់អតីតប្រធានាធិបតី លោក Joe Biden ដែលនឹងឃើញប្រទេសអូស្ត្រាលីទទួលបាននាវាមុជទឹកដើរដោយថាមពលនុយក្លេអ៊ែរផលិតនៅសហរដ្ឋអាមេរិកនៅឆ្នាំ២០៣២ មុនពេលផលិតលំដាប់ថ្នាក់ថ្មីជាមួយចក្រភពអង់គ្លេស។