អ៊ីស្រាអែល បានបន្តការវាយប្រហារតាមអាកាស និងបាញ់ផ្លោងនៅតំបន់ហ្កាហ្សា ដោយបង្កើនការព្រួយបារម្ភចំពោះអនាគតនៃកិច្ចព្រមព្រៀងបទឈប់បាញ់ដ៏ផុយស្រួយរបស់ខ្លួនជាមួយក្រុមហាម៉ាស ខណៈបេសកជនសហរដ្ឋអាមេរិកជំរុញផ្នែកការទូតដើម្បីទទួលបានកិច្ចព្រមព្រៀងត្រឡប់មកលើផ្លូវវិញ។

ទីភ្នាក់ងារការពារជនស៊ីវិលប៉ាឡេស្ទីនបាននិយាយថា មនុស្សបួននាក់ត្រូវបានសម្លាប់ក្នុងការវាយប្រហារពីរលើកដាច់ដោយឡែកពីគ្នា ទាំងពីរលើកកើតឡើង«ដោយការបាញ់កាំភ្លើងរបស់អ៊ីស្រាអែល ខណៈពួកគេកំពុងត្រឡប់ទៅពិនិត្យមើលលំនៅឋានរបស់ខ្លួន»នៅក្នុងទីក្រុង al-Shaaf។

យោធាអ៊ីស្រាអែលបានអះអាងថា ខ្លួនបានបាញ់ទៅលើក្រុមសកម្មប្រយុទ្ធឆ្លងកាត់ដែលគេហៅថាខ្សែបន្ទាត់លឿងនៃការកំណត់ព្រំដែន ហើយបានចូលទៅជិតកងទ័ពនៅក្នុងសង្កាត់ Shujayea ដែលនៅជាប់នឹងសង្កាត់ Tuffah ហើយ «បានបង្កការគំរាមកំហែង» ដល់ទាហានអ៊ីស្រាអែល។

ខ្សែបន្ទាត់លឿង ដែលកំណត់លើផែនទីបែងចែកដោយប្រធានាធិបតីសហរដ្ឋអាមេរិក លោក Donald Trump កាលពីថ្ងៃទី៤ ខែតុលា គឺជាព្រំដែនដែលទាហានអ៊ីស្រាអែលដកថយ ហើយនៅតែឈរជើងក្រោមកិច្ចព្រមព្រៀងបទឈប់បាញ់ជាមួយក្រុមហាម៉ាស។

ការផ្ទុះឡើងអំពើហិង្សាជាច្រើនលើកបានកើតឡើងចាប់តាំងពីបទឈប់បាញ់ដ៏ផុយស្រួយសម្របសម្រួលដោយសហរដ្ឋអាមេរិកចាប់ផ្តើមនៅថ្ងៃទី១០ ខែតុលា ដោយយ៉ាងហោចណាស់មានពលរដ្ឋប៉ាឡេស្ទីនជិត១០០នាក់ត្រូវបានសម្លាប់ នេះបើយោងតាមអាជ្ញាធរតំបន់ហ្កាហ្សា។