នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃចន្ទ (២០ តុលា) ថា ការវាយប្រហារច្រកអាកាសកាលពីថ្ងៃអាទិត្យ ទី១៩ ខែតុលា ចុងសប្ដាហ៍កន្លងទៅលើតំបន់ហ្កាហ្សាស្រ្ទីប របស់កងទ័ពអ៊ីស្រាអែល IDF បានធ្វើឡើងជាមួយនឹងគ្រាប់បែកចំនួន ១៥៣តោន ដែលនេះហាក់ស្មើនឹងការទទួលស្គាល់ច្បាស់ៗថា អ៊ីស្រាអែលបានបំពានលើកិច្ចព្រមព្រៀងបទឈប់បាញ់។

ថ្លែងបើកសម័យប្រជុំរដូវរងារបស់សភា លោក Netanyahu បានជួបការរំខានម្តងហើយម្តងទៀតពីសមាជិកសភាបក្សប្រឆាំង ដែលតវ៉ានឹងគោលនយោបាយរបស់លោក និងការអូសបន្លាយដោយចេតនានៃសង្គ្រាមអ៊ីស្រាអែល នៅតំបន់ហ្កាហ្សា។ លោកបាននិយាយថា “អំឡុងពេលបទឈប់បាញ់ មានទាហានពីរនាក់ស្លាប់ ហើយ IDF បានវាយទៅវិញដោយគ្រាប់បែក ១៥៣តោន និងកម្ទេចគោលដៅជាច្រើននៅទូទាំងហ្កាហ្សាស្រ្ទីប”។

ការិយាល័យប្រព័ន្ធផ្សព្វផ្សាយរបស់អាជ្ញាធរហ្កាហ្សា ដែលគ្រប់គ្រងដោយក្រុមហាម៉ាស បានអះអាងថា អ៊ីស្រាអែលបានបំពានបទឈប់បាញ់ដល់ទៅ ៨០ដង តាំងតែពីកិច្ចព្រមព្រៀងដែលសម្របសម្រួលដោយសហរដ្ឋអាមេរិកនោះ បានចូលជាធរមាននៅថ្ងៃទី១០ ខែតុលា មក ដោយបង្កឱ្យមានការស្លាប់យ៉ាងតិច ៩៧នាក់ និងរាប់រយនាក់ផ្សេងទៀតរងរបួស។ អ៊ីស្រាអែល បានចោទទៅវិញថា ក្រុមហាម៉ាសបានវាយប្រហារលើទាហាន IDF មុន នៅក្រុងភាគខាងត្បូង Rafah៕