រដ្ឋមន្ត្រីការពារជាតិអង់គ្លេស លោក John Healey បានប្រកាសកាលពីថ្ងៃចន្ទ ទី២០ ខែតុលាថា ចក្រភពអង់គ្លេសកំពុងបង្កើតអំណាចថ្មី ដើម្បីអនុញ្ញាតឱ្យកងទ័ពបាញ់ទម្លាក់យានដ្រូនដែលគំរាមកំហែងដល់មូលដ្ឋានយោធារបស់ខ្លួន។ លោក Healey បានបង្ហាញវិធានការឆ្លើយតបទៅនឹងអ្វីដែលត្រូវបានគេមើលឃើញយ៉ាងទូលំទូលាយថា ជាការគំរាមកំហែងកាន់តែខ្លាំងបង្កឡើងដោយរុស្ស៊ី។

លោក Healey បាននិយាយថា «កាលពីខែមុន យើងបានឃើញយានដ្រូនចំនួន១៩គ្រឿងឆ្លងកាត់ព្រំដែនប្រទេសប៉ូឡូញ។ ប៉ុន្មានថ្ងៃក្រោយមក យន្តហោះរុស្ស៊ីបានរំលោភលើដែនអាកាសរបស់ប្រទេសអេស្តូនី។ លោកបានប្រាប់មន្ត្រីការពារជាតិថា «នៅពេលយើងនិយាយ យើងកំពុងបង្កើតអំណាចថ្មី ដាក់ឱ្យចូលទៅជាច្បាប់តាមរយៈសេចក្តីស្នើច្បាប់កងកម្លាំងប្រដាប់អាវុធរបស់យើង ដើម្បីបាញ់ទម្លាក់យានដ្រូននៅលើទីតាំងយោធារបស់ចក្រភពអង់គ្លេស»។

លោក Healey និយាយបន្ថែមថានាយករដ្ឋមន្ត្រីមានឆន្ទៈពិចារណាកងទ័ពរបស់ចក្រភពអង់គ្លេសនៅលើទឹកដីអ៊ុយក្រែន «ប្រសិនបើចាំបាច់» ជាចំណាត់ការដែលលោកបានប៉ាន់ស្មានថានឹងត្រូវចំណាយលើសពី១០០ពាន់លានផោន។ យានដ្រូនបានរំខានដល់ដែនអាកាសកាន់តែខ្លាំងឡើងនៅទូទាំងទ្វីបអឺរ៉ុប ដែលជំរុញឱ្យមានការបិទអាកាសយានដ្ឋាន និងការលុបចោលជើងហោះហើរជាច្រើន។