អូឡាំពិក៖ ព្រឹត្តិការណ៍កីឡាអូឡាំពិករដូវរងាឆ្នាំ២០២២ នៅប្រទេសចិនកំពុងត្រូវបានប្រារព្ធឡើងក្រោមការរឹតបន្តឹងយ៉ាងខ្លាំង ដើម្បីការពារការរីករាលដាលនៃជំងឺកូវីដ-១៩។ អត្តពលិក អ្នកសារព័ត៌មាន និងអ្នកចូលរួមក្នុងព្រឹត្តិការណ៍ត្រូវបានបង្ខាំងនៅក្នុងរង្វង់បិទជិត ហើយអាចធ្វើដំណើរបានតែលើឡានក្រុងពិសេស សម្រាប់ព្រឹត្តិការណ៍កីឡាអូឡាំពិករដូវរងាប៉ុណ្ណោះ ដែលដឹកពួកគេទៅកាន់ទីកន្លែងប្រកួតហើយត្រឡប់ទៅសណ្ឋាគារវិញ។
មនុស្សដែលពាក់ព័ន្ធនឹងព្រឹត្តិការណ៍ទាំងអស់ត្រូវពាក់ម៉ាស N-95 ឬ KN-95 គ្រប់ពេលដែលជាផ្នែកនៃពិធីការដ៏តឹងរ៉ឹងរបស់ប្រទេសចិន។ សូម្បីតែអ្នកស្ម័គ្រចិត្ត បុគ្គលិកអនាម័យ និងចុងភៅដែលរស់នៅក្នុងទីក្រុងប៉េកាំង ក៏ត្រូវបានបង្ខាំងនៅក្នុងរង្វង់បិទយ៉ាងតឹងរ៉ឹង ហើយមិនអាចត្រឡប់ទៅផ្ទះវិញអស់ជាច្រើនខែ។ សូម្បីតែបន្ទាប់ពីការប្រកួតបានបញ្ចប់ក៏ដោយ បុគ្គលិកគាំទ្ររបស់ចិនប្រហែលជាត្រូវស្នាក់នៅដោយឡែក មុនពេលពួកគេអាចចាកចេញត្រលប់ទៅកាន់គេហដ្ឋានវិញ។ អត្តពលិក អ្នកសារព័ត៌មាន និងអ្នកចូលរួមក្នុងព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំងឆ្នាំ២០២២ ចាប់ផ្តើមថ្ងៃរបស់ពួកគេជាមួយនឹងការធ្វើតេស្តម៉ាស៊ីនធំ PCR test។
ប្រសិនបើគ្មានការធ្វើតេស្តប្រចាំថ្ងៃជាកាតព្វកិច្ចទេ ពួកគេនឹងមិនត្រូវបានអនុញ្ញាតឱ្យចេញពីសណ្ឋាគាររបស់ពួកគេឡើយ ដើម្បីការពារការរីករាលដាល។ អ្នកចូលរួម និងអ្នកពាក់ព័ន្ធបរទេសជាង ១២៥០០នាក់មកទល់ពេលនេះ បានមកដល់កីឡាអូឡាំពិករដូវរងានៅទីក្រុងប៉េកាំងឆ្នាំ២០២២ ហើយការធ្វើតេស្តកូវីដ-១៩ ជាង ៨០ម៉ឺនតេស្តត្រូវបានធ្វើឡើង នេះបើយោងតាមគណៈកម្មាធិការរៀបចំព្រឹត្តិការណ៍ កីឡាអូឡាំពិករដូវរងានៅទីក្រុងប៉េកាំង (BOCOG)។ មកទល់ពេលនេះមានមនុស្ស ៣៨៧នាក់ហើយត្រូវបានរកឃើញវិជ្ជមានកូវីដ-១៩៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
