នាយករដ្ឋមន្ត្រីថ្មីរបស់ប្រទេសជប៉ុន លោកស្រី Sanae Takaichi បានតែងតាំងស្ត្រីត្រឹមតែ ២រូបទៀតប៉ុណ្ណោះនៅក្នុងគណៈរដ្ឋមន្ត្រីដែលមានសមាជិកចំនួន ១៩នាក់របស់លោកស្រី នាថ្ងៃអង្គារ (ទី២១ ខែតុលា) នេះ បើទោះបីជានៅមុននេះបានសន្យាឲ្យមានតំណាងដូចកម្រិត «ប្រទេសអឺរ៉ុបខាងជើង» នៅក្នុងរដ្ឋាភិបាលរបស់លោកស្រីក៏ដោយ។

រដ្ឋលេខាធិការខុទ្ទកាល័យថ្មី លោក Minoru Kihara បាននិយាយថា មានរដ្ឋមន្ត្រីហិរញ្ញវត្ថុស្ត្រីដំបូងគេរបស់ប្រទេសជប៉ុន គឺលោកស្រី Satsuki Katayama ហើយលោកស្រី Kimi Onoda កាន់តំណែងរដ្ឋមន្ត្រីសន្តិសុខសេដ្ឋកិច្ច។

លោកស្រី Takaichi ដែលជាអ្នកកោតសរសើរអតីតនាយករដ្ឋមន្ត្រីអង់គ្លេស លោកស្រី Margaret Thatcher ត្រូវបានតែងតាំងជានាយករដ្ឋមន្ត្រីស្ត្រីដំបូងរបស់ជប៉ុន នៅថ្ងៃអង្គារនេះ។ លោកស្រីបាននិយាយកាលពីខែមុនថា សមតុល្យយេនឌ័រ នៅក្នុងគណៈរដ្ឋមន្ត្រីរបស់លោកស្រី និងគណៈកម្មាធិការប្រតិបត្តិនៃគណបក្សកាន់អំណាចរបស់លោកស្រី «នឹងអាចប្រៀបធៀបទៅចំនួនរបស់ប្រទេសអឺរ៉ុបខាងជើង»។

នៅក្នុងតំណែងនយោបាយ និងផ្នែកធុរកិច្ចរបស់ជប៉ុន គឺកម្រមានស្ត្រីណាស់។ ប្រទេសនេះបានជាប់ចំណាត់ថ្នាក់លេខ ១១៨ ក្នុងចំណោម ១៤៨ប្រទេស នៅក្នុងរបាយការណ៍ ស្តីពីគម្លាតយេនឌ័រឆ្នាំ២០២៥ របស់វេទិកាសេដ្ឋកិច្ចពិភពលោក (WEF)។ ប្រទេសតំបន់អឺរ៉ុបខាងជើង អ៊ីស្លង់ ហ្វាំងឡង់ និងន័រវែស ឈរនៅតំណែងលើគេទាំង ៣៕