អ្នកឆ្លើយឆ្លងព័ត៌មានរបស់ប្រព័ន្ធផ្សព្វផ្សាយ Al Arabiya រាយការណ៍ថា អនុប្រធានាធិបតីអាមេរិក លោក JD Vance បានធ្វើដំណើរទៅដល់ប្រទេសអ៊ីស្រាអែលហើយ នៅថ្ងៃអង្គារ (ទី២១ ខែតុលា) នេះ ខណៈទីក្រុងវ៉ាស៊ីនតោន ព្យាយាមធ្វើឲ្យមានស្ថិរភាពដំណាក់កាលដំបូងដ៏រង្គោះរង្គើនៃបទឈប់បាញ់ នៅតំបន់ហ្កាហ្សា ហើយជំរុញឲ្យអ៊ីស្រាអែល និងក្រុមហាម៉ាសឆ្ពោះទៅរកសម្បទានដែលត្រូវបានស្នើសុំឲ្យភាគីនីមួយៗធ្វើនៅក្នុងកិច្ចពិភាក្សាខាងមុខ។

ភាគីទាំង២ បានចោទដាក់គ្នា ជុំវិញការរំលោភលើបទឈប់បាញ់ម្តងហើយម្តងទៀត ចាប់តាំងពីកិច្ចព្រមព្រៀងនេះត្រូវបានឈានដល់ជាផ្លូវការកាលពី ៨ថ្ងៃមុន ដោយមានការផ្ទុះឡើងភ្លាមៗនូវហិង្សា និងការបន្ទោសនានា ពាក់ព័ន្ធនឹងល្បឿននៃការបញ្ជូនសាកសពចំណាប់ថ្នូរត្រឡប់មកវិញ ការនាំចូលជំនួយ និងការបើកព្រំដែន។

តែទោះជាយ៉ាងណាក្ដី ផែនការបទឈប់បាញ់ចំនួន ២០ចំណុចរបស់ប្រធានាធិបតីអាមេរិក លោក Donald Trump នឹងតម្រូវឲ្យមានវិធានការដ៏លំបាកបន្ថែមទៀត ដែលភាគីទាំង២ មិនទាន់បានប្តេជ្ញាចិត្តពេញលេញ ក្នុងនោះរួមទាំងការរំសាយអាវុធរបស់ក្រុមហាម៉ាស និងជំហានឆ្ពោះទៅរកការមានរដ្ឋប៉ាឡេស្ទីនមួយ។

ដំណើរទស្សនកិច្ចរបស់លោក Vance នេះ ធ្វើឡើងបន្ទាប់ពីមានកិច្ចពិភាក្សាកាលពីថ្ងៃចន្ទ រវាងនាយករដ្ឋមន្ត្រីអ៊ីស្រាអែល លោក Benjamin Netanyahu និងបេសកជនអាមេរិក លោក Steven Witkoff និងកូនប្រសាររបស់លោក Trump គឺលោក Jared Kushner ហើយកើតមាននៅពេលដែលក្រុមហាម៉ាស ជួបជាមួយអ្នកសម្របសម្រួល នៅទីក្រុងគែរ ប្រទេសអេហ្ស៊ីប៕