នៅថ្ងៃអង្គារ (ទី២១ ខែតុលា) នេះ ប្រទេសប៉ូឡូញបានព្រមានប្រធានាធិបតីរុស្ស៊ី លោក Vladimir Putin កុំឲ្យធ្វើដំណើរឆ្លងកាត់ដែនអាកាសរបស់ខ្លួន សម្រាប់ការទៅចូលរួមជំនួបកំពូល នៅប្រទេសហុងគ្រី ជាមួយប្រធានាធិបតីអាមេរិក លោក Donald Trump ដោយបញ្ជាក់ថា ខ្លួនអាចត្រូវបានបង្ខំអនុវត្តដីកាចាប់ខ្លួនអន្តរជាតិ ប្រសិនបើរូបលោកធ្វើដូច្នេះ។

តែរដ្ឋមន្ត្រីការបរទេសប៊ុលហ្គារី លោក Georg Georgiev ដែលត្រូវបានដកស្រង់សម្ដី បាននិយាយថា ប្រទេសរបស់លោក នឹងមានឆន្ទៈក្នុងការអនុញ្ញាតឲ្យលោក Putin ប្រើប្រាស់ដែនអាកាសរបស់ខ្លួន ប្រសិនបើកិច្ចប្រជុំកំពូលនេះ ធ្វើឡើងក្នុងប្រទេសហុងគ្រី។ លោក Trump បាននិយាយកាលពីសប្តាហ៍មុនថា លោកមានគម្រោងជួបជាមួយលោក Putin នៅទីក្រុង Budapest ខណៈដែលលោកព្យាយាមសម្របសម្រួល ដើម្បីបញ្ចប់សង្រ្គាមរបស់រុស្ស៊ី នៅអ៊ុយក្រែន។

តុលាការព្រហ្មទណ្ឌអន្តរជាតិ (ICC) បានចេញដីកាចាប់ខ្លួនលោក Putin ដោយចោទប្រកាន់លោកថា បាននិរទេសកុមាររាប់រយនាក់ចេញពីប្រទេសអ៊ុយក្រែន ដោយខុសច្បាប់។ រុស្ស៊ីមិនទទួលស្គាល់យុត្តាធិការរបស់ ICC ហើយបដិសេធការចោទប្រកាន់នេះ។

រដ្ឋមន្ត្រីការបរទេសប៉ូឡូញ លោក Radoslaw Sikorski បានប្រាប់វិទ្យុ Rodzina ថា៖ «ខ្ញុំមិនអាចធានាបានថា តុលាការឯករាជ្យរបស់ប៉ូឡូញ នឹងមិនបញ្ជាឲ្យរដ្ឋាភិបាលបង្ខំឲ្យយន្តហោះបែបនេះចុះចត ដើម្បីប្រគល់ជនសង្ស័យទៅតុលាការ នៅទីក្រុងឡាអេនោះឡើយ»។

ដីកា ICC តម្រូវឲ្យរដ្ឋជាសមាជិករបស់ស្ថាប័ននេះចាប់ខ្លួនលោក Putin ប្រសិនបើរូបលោកមានវត្តមាននៅលើដែនដីរបស់ខ្លួន៕