នៅក្នុងរបាយការណ៍មួយ នាថ្ងៃអង្គារ (ទី២១ ខែតុលា) នេះ ធនាគារពិភពលោក (WB) បានឲ្យដឹងថា ការកសាងឡើងវិញរបស់ប្រទេសស៊ីរី ក្រោយសង្គ្រាមស៊ីវិល អាចចំណាយប្រាក់រហូតដល់ ២១៦ពាន់លានដុល្លារ ដោយការប៉ាន់ប្រមាណនេះកើតមានបន្ទាប់ពីជម្លោះអស់រយៈពេលជាង ១៣ឆ្នាំញាំញីប្រទេសនេះ។

ការកសាងឡើងវិញ គឺជាបញ្ហាប្រឈមដ៏ធំបំផុតមួយដែលអាជ្ញាធរថ្មីរបស់ប្រទេសស៊ីរី កំពុងជួបប្រទះ ក្រោយការផ្តួលរំលំរបស់មេដឹកនាំយូរអង្វែង លោក Bashar al-Assad កាលពីខែធ្នូឆ្នាំមុន។

ធនាគារពិភពលោក បានលើកឡើងនៅក្នុងរបាយការណ៍ចុងក្រោយរបស់ខ្លួនថា៖ «ការចំណាយលើការកសាងឡើងវិញរបស់ប្រទេសស៊ីរី ត្រូវបានប៉ាន់ប្រមាណថា មានចំនួន ២១៦ពាន់លានដុល្លារ បន្ទាប់ពីមានជម្លោះអស់រយៈពេលជាង ១៣ឆ្នាំ»។

សង្រ្គាមស៊ីវិលស៊ីរី ដែលបានផ្ទុះឡើងក្នុងឆ្នាំ២០១១ ដោយសារការគាបសង្កត់យ៉ាងឃោរឃៅរបស់លោក Assad ចំពោះការតវ៉ាប្រឆាំងរដ្ឋាភិបាល បានសម្លាប់មនុស្សជាងកន្លះលាននាក់ និងបំផ្លិចបំផ្លាញហេដ្ឋារចនាសម្ព័ន្ធរបស់ប្រទេសនេះ។

របាយការណ៍នោះបានបញ្ជាក់ថា៖ «ជម្លោះនេះបានធ្វើឲ្យខូចខាតជិត ១ភាគ៣នៃភាគហ៊ុនមូលធនសរុបមុនជម្លោះរបស់ប្រទេសស៊ីរី ដោយការខូចខាតរូបវ័ន្តផ្ទាល់ ចំពោះហេដ្ឋារចនាសម្ព័ន្ធ អគារលំនៅឋាន និងអគារមិនមែនលំនៅឋាន ត្រូវបានប៉ាន់ស្មានមានចំនួន ១០៨ពាន់លានដុល្លារ»។

ក្នុងចំណោមការវាយតម្លៃប្រភេទផ្សេងៗ ហេដ្ឋារចនាសម្ព័ន្ធ គឺរងប៉ះពាល់ខ្លាំងបំផុត ដោយមានចំនួន ៤៨ភាគរយនៃការខូចខាតសរុប ដែលស្មើនឹង ៥២ពាន់លានដុល្លារ។ របាយការណ៍នេះបានប៉ាន់ប្រមាណតម្លៃនៃទ្រព្យសកម្មរូបវន្តថា មានចន្លោះពី ១៤០ពាន់លានដុល្លារ ទៅ ៣៤៥ពាន់លានដុល្លារ «ដោយការប៉ាន់ប្រមាណមិនខ្ពស់ពេក» គឺចំនួន ២១៦ពាន់លានដុល្លារ៕