ការបិទរដ្ឋាភិបាលរបស់សហរដ្ឋអាមេរិក បានឈានចូលដល់សប្តាហ៍ទី៤ របស់ខ្លួនហើយ គិតតាំងពីថ្ងៃចាប់ផ្ដើមទី១ ខែតុលា មក ដោយគណបក្សប្រជាធិបតេយ្យ និងគណបក្សសាធារណរដ្ឋ នៅមានការខ្វែងគំនិតគ្នាយ៉ាងជ្រាលជ្រៅក្នុងសភា លើលក្ខខណ្ឌសម្រាប់ការបើកប្រតិបត្តិការសហព័ន្ធឡើងវិញ។

ប្រព័ន្ធផ្សព្វផ្សាយក្នុងស្រុករាយការណ៍ថា ភាពជាប់គាំងដ៏អូសបន្លាយ ដែលកើតចេញពីជម្លោះលើគោលនយោបាយថែទាំសុខភាព និងអាទិភាពសារពើពន្ធ បានធ្វើឱ្យផ្នែកធំៗនៃរដ្ឋបាលសហព័ន្ធមិនអាចដំណើរការបាន ហើយប្រជាជនអាមេរិករាប់លាននាក់ព្រួយបារម្ភកាន់តែខ្លាំងឡើងពីផលប៉ះពាល់សេដ្ឋកិច្ច និងសង្គមដោយសារតែបញ្ហានេះ។

រហូតមកដល់ថ្ងៃអង្គារ ទី២១ ខែតុលា (ពេលវេលានៅសហរដ្ឋអាមេរិក) មិនទាន់មានសញ្ញានៃការបញ្ចប់ភាពជាប់គាំងក្នុងពេលដ៏ខ្លីខាងមុខនេះទេ។ ទាំងបក្សប្រជាធិបតេយ្យ និងបក្សសាធារណរដ្ឋបានបដិសេធមិនព្រមសម្រុះសម្រួលនឹងគ្នា ដែលនាំឱ្យការបោះឆ្នោតផ្ដល់មូលនិធិដើម្បីបើករដ្ឋាភិបាលបណ្ដោះអាសន្ន ត្រូវបរាជ័យជាច្រើនលើក។

ប្រធានសភាអាមេរិកមកពីបក្សសាធារណរដ្ឋ លោក Mike Johnson បានព្រមានកាលពីសប្ដាហ៍មុនថា ការបិទរដ្ឋាភិបាលនេះអាចក្លាយជារយៈពេលវែងបំផុតក្នុងប្រវត្តិសាស្ត្រ ដោយអះអាងថា លោក "នឹងមិនចរចា" ជាមួយបក្សប្រជាធិបតេយ្យឡើយ រហូតដល់ពួកគេផ្អាកការទាមទារ ហើយសម្រេចចិត្តបើករដ្ឋាភិបាលឡើងវិញ។ ប្រធានាធិបតីអាមេរិក លោក Donald Trump កាលពីថ្ងៃអង្គារ (២១ តុលា) ក៏បានច្រានចោលនូវសំណើរបស់សមាជិកសភាជាន់ខ្ពស់នៃបក្សប្រជាធិបតេយ្យក្នុងការជួបប្រជុំជាមួយលោក ដោយនិយាយថា រឿងនេះអាចកើតឡើងបាន ទាល់តែការបិទរដ្ឋាភិបាលត្រូវបានបញ្ចប់៕